नवी दिल्ली- आगामी राष्ट्रपतीपदाच्या निवडणुकीसाठी विरोधी पक्षातर्फे यशवंत सिन्हा यांच्या नावाची घोषणा करण्यात आली आहे. राष्ट्रपतीपदाच्या उमेदवाराबाबत विरोधी पक्षांच्या मंगळवारी झालेल्या बैठकीत महत्त्वपूर्ण निर्णय घेण्यात आला.
या बैठकीला काँग्रेस नेते जयराम रमेश, सुधींद्र कुलकर्णी, दीपंकर भट्टाचार्य, डी राजा, तिरुची शिवा (डीएमके), प्रफुल्ल पटेल, येचुरी, एनके प्रेमचंद्रन (आरएसपी), मनोज झा, मल्लिकार्जुन खर्गे, रणदीप सुरजेवाला, हसनैन मसूदी (नॅशनल कॉन्फरन्स), एमआयएमचे खासदार इम्तियाज जलील, अभिषेक बॅनर्जी आणि राम गोपाल यादव उपस्थित होते.
काँग्रेस नेते जयराम रमेश म्हणाले की, ‘यशवंत सिन्हा यांचा प्रचार करण्यासाठी एक समिती स्थापन करण्यात आली आहे.’ काँग्रेसचे ज्येष्ठ खासदार मल्लिकार्जुन खर्गे म्हणाले की, ‘लोकशाहीचे रक्षण करु शकेल, असा उमेदवार आम्ही दिला आहे.’
यशवंत सिन्हा 27 जून रोजी उमेदवारी अर्ज दाखल करतील असे मानले जात आहे. विशेष म्हणजे विरोधी पक्षांच्या मागील बैठकीत राष्ट्रवादीचे अध्यक्ष शरद पवार यांच्या नावाचा प्रस्ताव तृणमूल काँग्रेसच्या प्रमुख ममता बॅनर्जी यांनीही मांडला होता, मात्र पवारांनी राष्ट्रपतीपदाची उमेदवार होण्यास नकार दिला होता. राष्ट्रपतीपदासाठी गोपाळ कृष्ण गांधी यांचेही नाव पुढे आले होते.
दुसरीकडे, आज केंद्रातील भाजपनेही बैठक बोलावली आहे. राष्ट्रपती निवडणुकीसंदर्भात भाजपने आज संध्याकाळी संसदीय पक्षाची बैठक बोलावली आहे. या बैठकीला मंथन सभा असे नाव देण्यात आले आहे. सूत्रांनी दिलेल्या माहितीनुसार, पंतप्रधान नरेंद्र मोदीही या बैठकीला उपस्थित राहू शकतात. यापूर्वी भाजप अध्यक्ष जेपी नड्डा आणि संरक्षण मंत्री राजनाथ सिंह यांच्यावर उमेदवाराच्या नावावर एकमत करण्याची जबाबदारी सोपवण्यात आली होती.
दरम्यान, राष्ट्रपतीपदाच्या निवडणुकीसाठी 18 जुलै रोजी मतदान होणार आहे. तर मतमोजणीची तारीख 21 जुलै निश्चित करण्यात आली आहे. विद्यमान राष्ट्रपती रामनाथ कोविंद यांचा कार्यकाळ 24 जुलै 2022 रोजी संपत आहे.