गुजरात : महाराष्ट्राच्या खान्देशातील माहेर असलेल्या एक महिला उमेदवार गुजरात विधानसभेच्या तिसऱ्यांदा निवडणूक रिंगणात उतरल्या आणि जिंकल्यासुद्धा ! भाजपच्या या महिला उमेदवार म्हणजे संगीता पाटील.
गुजरातमधील भाजपच्या विद्यमान आमदार संगिता पाटील यांनी सलग तिसऱ्यांदा लिंबायतची जागा राखत काँग्रेस आणि आपच्या उमेदवारांचा पराभव केला. संगिता पाटील यांना 51363 तर काँग्रेसचे गोपाळ पाटील यांना 20018 मतं मिळाली. आम आदमी पक्षाचे उमेदवार पंकजभाई तायडे यांना 21718 मतं मिळाली. संगिता पाटील यांनी ही जागा 29645 मतांनी जिंकली. लिंबायत जागेसाठी पहिल्या टप्प्यात 1 डिसेंबर रोजी मतदान झालं होतं.
याआधी 2012 आणि 2017 मध्ये लिंबायतची जागा भाजपनं जिंकली होती. खानदेशच्या जळगाव जिल्ह्यातील पाचोरा तालुक्यातील सारवे बुद्रुक हे गाव म्हणजे आमदार संगीता पाटील यांचं माहेर. त्यांचे वडील डहाणू येथे पोलीस दलात कार्यरत होते. त्यांचा एक भाऊ पोलीस दलात आहे तर दुसरा भाऊ व्यवसाय करतो. पाचोरा तालुक्यातील सारवे बुद्रूक या लहानशा खेड्यात त्यांचा जन्म झाला. त्यांना दोन बहिणी देखील आहेत. संगीता पाटील यांनी पदवीपर्यंतचं शिक्षण घेतलं आहे. गुजरात विधानसभेत आतापर्यंत त्या दोन वेळा भाजपच्या तिकीटावर आमदार म्हणून निवडून गेल्या असून सुरतमधील लिंबायत मतदारसंघातून भाजपानं त्यांना यावेळी पुन्हा एकदा संधी दिली आणि त्यांनी विजयाची हॅट्ट्रिक साधली.
