नवसारी- लग्नकार्य उरकले की सगळ्यांना उत्सुकता असते की लग्नामध्ये काय काय गिफ्ट आले ते पाहण्याची. पण गुजरातमध्ये एका नवविवाहित तरुणाला लग्नात आलेले गिफ्ट पाहणे भयंकर महागात पडले आहे. लग्नात आलेले गिफ्ट फोडताच प्रचंड मोठा स्फोट झाला. आणि या स्फोटात हा तरुण गंभीररीत्या भाजला आहे. ही घटना गुजरातमधील नवसारी जिल्ह्यात ही घटना घडली आहे.
मिंधबारी गावातील स्थानिक ग्रामस्थांच्या म्हणण्यानुसार, लतेश गावित यांचे एक-दोन दिवसांपूर्वी दक्षिण गुजरातमधील नवसारी जिल्ह्यातील वांसदा तालुक्यातील गंगापूर गावातील एका मुलीसोबत लग्न झालं. या जोडप्याला त्यांच्या लग्नात नातेवाईक आणि मित्रांनी भेटवस्तू दिल्या होत्या. मंगळवारी सकाळी गावित त्यांचा पुतण्या जियानसह या भेटवस्तू फोडत असताना त्यामध्ये एक खेळणे आढळून आले. रिचार्ज करण्यायोग्य हे खेळणे पाहून त्यांनी हे खेळणे रिचार्ज करण्याचा प्रयत्न केला. अचानक मोठा स्फोट होऊन दोघेही गंभीररीत्या भाजले.
गावित यांच्या हाताला, डोक्याला आणि डोळ्यांना जखमा झाल्या आहेत, तसेच उजव्या हाताच्या मनगटाचाही भाग कापला. 3 वर्षीय जियानच्या डोक्याला आणि डोळ्यांना गंभीर दुखापत झाली. त्यांना तातडीने नवसारीच्या शासकीय रुग्णालयात दाखल करण्यात आलं आहे. सध्या त्यांच्यावर उपचार सुरु आहेत.
या घटनेनंतर वेगळीच माहिती समोर आली असून हे खेळणे त्यांना कोयंबा येथील रहिवासी राजू पटेल यांनी भेट दिल्याचे समजले. राजू पटेल याचे वधूच्या मोठ्या बहिणीशी प्रेमसंबंध होते. नंतर त्यांचे ब्रेकअप झाले. त्यानेच हे घडवून आणल्याचा संशय व्यक्त केला जात आहे.
