मुंबई : महाराष्ट्राच्या राजकारणामध्ये रोजच नवीन खळबळ उडवणारी घटना घडते आहे. सर्वप्रथम भाजप आणि शिवसेनेची युती तुटली. शिवसेना पक्षप्रमुख उद्धव ठाकरे यांनी राष्ट्रवादी काँग्रेस आणि काँग्रेससह हात मिळवणी करून मुख्यमंत्री पदावर विराजमान झाले. त्यानंतर पक्षांतर्गत क्लेशातून एकनाथ शिंदे चाळीस आमदारांसह बाहेर पडले आणि पुन्हा एकदा भाजपसोबत येऊन सत्ता स्थापन केली. आता सध्या एकनाथ शिंदे मुख्यमंत्री पदावर विराजमान झाले आणि शिवसेनेने संभाजी ब्रिगेड सोबत हात मिळवणी केली.
रोजच राजकारणात उलथापालथ सुरूच आहे. अशातच आता भाजप आणि मनसेची युती होण्याचे संकेत मिळत आहेत. उपमुख्यमंत्री देवेंद्र फडणवीस यांना श्री गणेशाच्या दर्शनासाठी आमंत्रण देण्याच्या कारणाने राज ठाकरे यांनी सागर बंगल्यावर देवेंद्र फडणवीस यांची भेट घेतली. त्यानंतर कालच मुख्यमंत्री एकनाथ शिंदे यांनी शिवतीर्थ या राज ठाकरे यांच्या निवासस्थानी जाऊन बाप्पांचे दर्शन घेतलं. या सर्वच हालचाली मनसे भाजपच्या युतीचे संकेत देत असतानाच आता केंद्रीय गृहमंत्री अमित शहा देखील आपल्या मुंबई दौऱ्यामध्ये राज ठाकरे यांची भेट घेणार असल्याची शक्यता वर्तवली जाते आहे. त्यामुळे भविष्यामध्ये महापालिका निवडणुका पाहता आणि मनसे प्रमुख राज ठाकरे यांच्या भाजपच्या बड्या नेत्यांची भेटीगाठी पाहता मनसे भाजप युती होण्याची शक्यता वर्तवली जाते आहे.
