पुणे : तिरुपती बालाजीला देवदर्शनासाठी गेलेल्या दोन कुटुंबांचा कर्नाटक मधील दावणगिरी गावाजवळ भीषण अपघात झाला. हा अपघात एवढा भीषण होता की, भरधाव वाहनातील दोन महिला वाहनातून अक्षरशः फेकल्या गेल्या, आणि यात त्यांचा जागीच मृत्यू झाला असल्याचे समजते आहे.
मिळालेल्या सविस्तर माहितीनुसार, पुण्यातील धानोरी येथे एकाच सोसायटीत राहणारे दोन कुटुंब तिरुपती बालाजीला देवदर्शनासाठी गेले होते. कर्नाटक मधील दावणगिरी गावाजवळ या कुटुंबांचा भीषण अपघात झाला. या अपघातामध्ये मानसी सचिन शेजुळ आणि उज्वला सचिन बर्वे यांचा मृत्यु झाला आहे. तर सचिन बर्वे हे या अपघातात जखमी झाले असून त्यांच्यावर सध्या उपचार सुरू आहेत.
बर्वे यांचा मुलगा सौरभ बर्वे हा गाडी चालवत होता. दावणगिरी गावातील एका रस्त्यावरून अचानक गाडीवरील नियंत्रण सुटले. गाडीचा वेग अधिक असल्याने गाडीचे नियंत्रण मिळवता आले नाही आणि गाडीने अक्षरशः दोन ते तीन वेळा पलटी घेतली अशी माहिती समजते.