आज रामनवमीचा सण सर्वत्र उत्साहात सुरु आहे.अशातच मध्य प्रदेशातील इंदूरमधून एक धक्कादायक घटना समोर आली आहे. विहिरीवरील छत तुटल्यामुळे मंदिरात श्रीरामाच्या दर्शनासाठी आलेले २५ भाविक विहिरीत कोसळले. इंदूरच्या श्री बेलेश्वर महादेव झूलेलाल मंदिरात ही घटना घडली. बचावकार्य सुरु असून या भाविकांना बाहेर काढण्याचे कार्य सुरु आहे.
रामनवमीमुळे मंदिरात दर्शनासाठी मोठ्या संख्येने भाविक आले होते. मंदिरात रामनवमीनिमित्त धार्मिक कार्यक्रम सुरु असताना मंदिराच्या आवारात असलेल्या विहिरीवरील छत तुटले. आणि त्यावर उभे असलेले भाविक विहिरीत कोसळले. या घटनेमुळे सर्वत्र हलकल्लोळ माजला. या घटनेत सुमारे २५ भाविक जखमी झाल्याची शक्यता आहे. घटनेची माहिती मिळताच पोलीस आणि अग्निशमन दलाने धाव घेऊन मदतकार्य सुरु केले. तत्पूर्वी विहिरीत पडलेल्या भाविकांना बाहेर काढण्याचे प्रयत्न सुरु होते. सहा भाविकांना विहिरीबाहेर काढण्यात यश आलं असून त्यांना उपचारासाठी रुग्णालयात दाखल करण्यात आले आहे.
