पुणे- शिवसेनाप्रमुख बाळासाहेब ठाकरे यांच्या लहान भगिनी श्रीमती संजीवनी करंदीकर (वय ८४) यांचे आज पुण्यात वृद्धापकाळाने निधन झाले.
संजीवनी करंदीकर यांचा जन्म पुण्यात झाला होता. त्यांच्या आयुष्यातील बरीच वर्षे पुण्यात गेली. त्यांनी आंतरजातीय विवाह केला होता. रिझर्व बॅंक ऑफ इंडियामध्ये ३८ वर्षे मशीन सेक्शन अधिकारी म्हणून त्यांनी काम केले होते. त्यांच्या निधनाबद्दल शिवसेनेच्या नेत्या मनीषा कायंदे, नगरविकास मंत्री एकनाथ शिंदे यांच्यासह अनेकांनी श्रद्धांजली वाहिली आहे.
मुख्यमंत्री उद्धव ठाकरे यांनी देखील आपल्या आत्याच्या निधनाबद्दल शोक व्यक्त केला आहे. मुख्यमंत्री शोकसंदेशात म्हणतात, “संजीवनी करंदीकर या आमच्या आत्या होत्याच, पण प्रबोधनकार ठाकरे यांच्या कन्या व शिवसेनाप्रमुखांच्या भगिनी होत्या. त्यांना एक समृद्ध वारसा लाभला व त्यांनी तो शेवटपर्यंत जपला. त्यांच्या जाण्याने शेवटचा दुवाही निखळला. संजूआत्या म्हणून त्या ठाकरे कुटुंबात प्रख्यात होत्या. प्रबोधनकारांप्रमाणेच त्या परखड होत्या. वाचनाचा छंदही अफाट होता”
“प्रबोधनकारांच्या अनेक गोष्टी त्या आम्हाला सांगत. सगळ्यात छोटी बहीण म्हणून शिवसेनाप्रमुखांचा संजूआत्यावर विशेष लोभ होता व संजूआत्याही आम्हा सगळ्यांना तेवढ्याच मायेने वागवत आल्या. त्यांच्या जाण्याने ठाकरे कुटुंबाने मायेचे छत्र गमावले. ईश्वर त्यांच्या आत्म्यास शांती देवो!”
थोर समाजसुधारक प्रबोधनकार ठाकरे यांच्या कन्या,हिंदुहृदयसम्राट शिवसेनाप्रमुख बाळासाहेब ठाकरे यांच्या भगिनी व मुख्यमंत्री तथा शिवसेना पक्षप्रमुख उद्धवजी ठाकरे यांच्या आत्या संजीवनी करंदीकर यांचे आज दुःखद निधन झाले.परमेश्वर त्यांच्या आत्म्यास सद्गती प्रदान करो.भावपूर्ण श्रद्धांजली! pic.twitter.com/e3CddxULr6
— Eknath Shinde – एकनाथ शिंदे (@mieknathshinde) May 13, 2022
💐💐 भावपूर्ण श्रद्धांजली💐💐
थोर समाज सुधारक प्रबोधनकार केशवराव सिताराम ठाकरे यांची कन्या, शिवसेनाप्रमुख बाळासाहेब ठाकरे यांच्या लहान भगिनी, शिवसेना पक्षप्रमुख मुख्यमंत्री श्री उध्दवसाहेब ठाकरे यांची आत्या श्रीमती संजीवनी करंदीकर यांचे आज वयाच्या 84 व्या वर्षी दुःखद निधन झाले. pic.twitter.com/DxdyyX5jDb— Dr.Manisha Kayande (@KayandeDr) May 13, 2022
