सांगली – सांगली जिल्ह्यातील कवठेमहांकाळ तालुक्यातील नांगोळे शिवारात एक दुर्दैवी घटना घडली आहे. एका मेंढ्यांच्या कळपावर वीज कोसळून मेंढपाळासह १० मेंढ्यांचा मृत्यू झाला. या घटनेमुळे हळहळ व्यक्त होत आहे. ही घटना गुरुवारी संध्याकाळी घडली.
रामचंद्र गडदे असे या मेंढपाळाचे नाव आहे. रामचंद्र गडदे हे नेहमीप्रमाणे आपल्या मेंढ्या चारावयास घेऊन गेले होते. गेल्या दोन दिवसांपासून वातावरणात बदल आणि विजांचा कडकडाट होत असल्याने ते लवकरच घरी परतत होते. गुरुवारी मेंढ्या चारुन घराकडे परतत असतानाच कवठेमहांकाळ जत रस्त्यावर पिंपळवाडी बस थांब्याच्या पुढे लोखंडी पुलाच्या जवळ नांगोळे गावच्या हद्दीत आले असता वादळी वारे व पाऊस जोरदार सुरू झाला. याच वेळी विजांचा कडकडाट होऊन रामचंद्र गडदे यांच्या अंगावर व मेंढयाच्या कळपावर वीज कोसळली त्यात गंभीर भाजल्यामुळे त्यांचा जागीच मृत्यू झाला.
घटनेची माहिती मिळताच गडदे यांचा भाचा सुनील उबाले यांनी घटनास्थळी धाव घेतली. त्यांनी तातडीने गडदे यांना रुग्णालयात दाखल केले. पण डॉक्टरांनी त्यांना मृत घोषित केले. या घटनेमुळे परिसरात हळहळ व्यक्त होत आहे.
