व्हॉट्सअ‍ॅप चॅटिंग आणि व्हिडीओ कॉल करून लैंगिक भावना उत्तेजित करणारा व्हिडीओ दाखविला.नग्न होण्यास भाग पाडलं आणि नंतर व्हिडीओ कॉलचे स्क्रीन रेकॉर्डिंग करून तो व्हिडीओ व्हायरल करण्याची धमकी देत 4 लाख 66 हजार रूपये लुबाडल्याची घटना पुण्यात उघडकीस आली आहे.
याप्रकरणी मॉडेल कॉलनीमधील एका ६४ वर्षांच्या ज्येष्ठ नागरिकाने चतु:श्रृंगी पोलिस ठाण्यात फिर्याद दिली आहे. हा प्रकार २१ ते २५ मार्च दरम्यान घडला.
याबाबत पोलिसांनी दिलेल्या माहितीनुसार, फिर्यादी हे एका कंपनीतून निवृत्त झाले आहेत. दि. २१ ते २५ मार्च दरम्यान ते घरी असताना त्यांना व्हॉट्सअॅपवर कॉल आला. त्यांच्याशी चॅटिंग आणि व्हिडीओ कॉल करून त्यांच्या लैंगिक भावना उत्तेजित होतील असा व्हिडीओ दाखविला आणि त्यांना नग्न होण्यास भाग पाडले.
फिर्यादी यांचा हा व्हिडीओ कॉल स्क्रीन रेकॉर्ड केला. त्यानंतर त्यांना हा व्हिडीओ व्हायरल करण्याची धमकी देऊन त्यांच्या पैसे मागण्यास सुरुवात करण्यात आली. त्यामुळे त्यांनी घाबरून ती सांगेल तसे पैसे देण्यास सुरुवात केली. त्यानंतर त्यांना सायबर सेल दिल्ली क्राईम ब्रँचमधून राम पांड्ये बोलत असल्याचे सांगून तुमचा व्हिडीओ यूट्यूबवर अपलोड होणार असून, पायल शर्मा हिने तक्रार दिल्याचे सांगितले.
त्यानंतर यूट्यूब प्रतिनिधीशी बोला, असे सांगून संजय सिंग नाव सांगणाऱ्याचा नंबर दिला. त्याने व्हिडीओ डिलिट करण्यासाठी दीड लाखाची मागणी केली. त्यांनी पैसे दिल्यावर आता तुमची केस मुंबई सायबर सेलला पाठविणार असल्याची भीती दाखवून त्यांच्याकडे ५ लाखांची मागणी केली. त्यामुळे आपली फसवणूक होत असल्याचे लक्षात आल्यावर त्यांनी पोलिसांकडे धाव घेतली. पोलिस निरीक्षक चिंतामण तपास करीत आहेत.
