कोल्हापूर- शिवसेनेच्या निमंत्रणाकडे संभाजीराजे यांनी पाठ फिरवली असून संभाजीराजे छत्रपती शिवसेनेत प्रवेश करणार नाहीत अशी सूत्रांची माहिती आहे. आज पहाटेच ते कोल्हापूरकडे रवाना झाल्याचेही समजते आहे. छत्रपती संभाजीराजे यांनी शिवसेना पुरस्कृत उमेदवार म्हणून राज्यसभेची निवडणूक लढवण्यात कोणताही रस नसल्याचे जवळपास स्पष्ट झाले आहे.
शिवसेना नेत्यांच्या शिष्टमंडळाने ट्रायडंट हॉटेलमध्ये जाऊन संभाजीराजे छत्रपती यांची भेट घेतली होती. खासदारकी हवी असेल तर संभाजीराजे छत्रपती यांनी शिवसेनेत प्रवेश करावा, अशी शिवसेनेने अट घातली होती. त्याप्रमाणे शिवसेनेने संभाजीराजे छत्रपती यांना पक्ष प्रवेशाचे निमंत्रण दिले होते. संभाजीराजे छत्रपती आज दुपारी 12 वाजता वर्षा बंगल्यावर मुख्यमंत्री आणि शिवसेना पक्षप्रमुख उद्धव ठाकरे यांची भेट घेणार होते.
त्यामुळे संभाजीराजे शिवबंधन बांधणार का याकडे सर्वांचे लक्ष लागले होते. परंतु संभाजीराजे यांनी शिवसेनेच्या निमंत्रण पाठ फिरवली असून ते कोल्हापूरला रवाना झाल्याची माहिती सूत्रांनी दिली आहे. संभाजीराजे यांचे मुंबईत असणारे कार्यकर्ते देखील आपापल्या गावी निघून गेले आहेत.
या सर्व घडामोडी पाहता शिवसेना पुरस्कृत म्हणून राज्य सभेची निवडणूक लढविण्यास संभाजीराजे उत्सुक नसून अपक्ष म्हणूनच निवडणूक लढवणार असल्याचे जवळपास स्पष्ट झाले आहे. आता शिवसेना सहाव्या जागेसाठी आपला उमेदवार जाहीर करणार का ? हे आता पाहावे लागणार आहे.
हा गुंता सोडविण्यासाठी छत्रपती संभाजीराजे यांच्यासमोर तिचं पर्याय आहेत. शिवसेनेची ऑफर स्वीकारणे, अपक्ष लढणे किंवा निवडणुकीतून माघार घेणे. यापैकी शिवसेनेची ऑफर संभाजीराजे यांनी नाकारल्याचे जवळपास स्पष्ट झाले आहे. आता उर्वरित दोन पर्यायांपैकी छत्रपती कोणता पर्याय निवडणार याकडे राजकीय वर्तुळात उत्सुकता निर्माण झाली आहे.
