विधिमंडळ नव्हे हे चोरमंडळ आहे या संजय राऊत यांच्या वक्तव्यावरून महाराष्ट्रात घमासान सुरु आहे. महाराष्ट्रातील विधिमंडळाचा हा अपमान असून संजय राऊत यांच्याविरोधात हक्कभंगाची कारवाई करा, अशी मागणी जोर धरत असतानाच, नितेश राणेंनी थेट इशारा संजय राऊत यांना दिला आहे.
महाराष्ट्राच्या विधिमंडळात आज संजय राऊत यांच्या वक्तव्याने खडाजंगी सुरु असतानाच नितेश राणे यांनी पुन्हा एक वादग्रस्त वक्तव्य केलं आहे. विधानसभेत नितेश राणे म्हणाले,संजय राऊत रोज सकाळपासून ऐकावं लागतंय. काय घेऊन खाललंय आपण त्याचं? त्याचा आणि शिवसेनेचा इथे काय संबंध? सामनामध्ये येण्याच्या आधी तो लोकसभेत असायचा. लोकप्रभामध्ये शिवसेनेच्या विरोधात त्याचे लेख असायचे. संजय राऊतने शिवसेना आणि हिंदुहृदय सम्राट यांच्या विरोधातही लिहिलेलं आहे. संजय राऊत पोलिसांचं संरक्षण घेऊन फिरतो. देशाच्या केंद्रीय मंत्र्यांना तो शिव्या घालतो. त्याचं फक्त १० मिनिटं संरक्षण काढा, तो उद्या दिसणार नाही, असं वक्तव्य नितेश राणे यांनी केलं. भर विधानसभेत राणे यांनी केलेल्या वक्तव्यावरून राजकीय वर्तुळात खळबळ माजली आहे.
ससेच संजय राऊत यांनी आज कोल्हापुरात बोलताना अमित शाह यांचा उल्लेख करताना पुन्हा एकदा मोगँबो हा शब्द वापरला. त्यावरून नितेश राणे यांनी आक्रमक प्रतिक्रिया दिली. याआधी नारायण राणे यांनी संजय राऊत यांच्या खासदारकीवरून टीका केली होती. संजय राऊत यांनी त्यांच्याविरोधात कायदेशीर नोटीस पाठवली आहे. महाराष्ट्रातील सत्तासंघर्षाच्या पार्श्वभूमीवर तो अधिक उफाळून येण्याची चिन्ह आहेत.
