भाजप खासदार गिरीश बापट यांच्या निधनामुळे पुणे लोकसभा मतदारसंघाची जागा रिकामी झाली आहे. त्यामुळे या जागेवर पोटनिवडणूक होण्याची शक्यता आहे. त्यादृष्टीने सत्ताधारी भाजप आणि विरोधी महाविकास आघाडी यांनी तयारी सुरु केली आहे. भाजपकडून पुणे लोकसभेसाठी तीन नावांचा विचार सुरु आहे तर महाविकास आघाडी पुन्हा एकदा नवनिर्वाचित आमदार रवींद्र धंगेकर यांचे नाणे पुन्हा वापरण्याच्या विचारात आहे.
‘मविआ’कडून कसब्याचे नवनिर्वाचित आमदार रवींद्र धंगेकर यांना खासदारकीसाठी पुण्याच्या पोटनिवडणुकीचं तिकीट दिलं जाऊ शकतं. रवींद्र धंगेकर यांच्याबरोबरच मोहन जोशी यांचे नाव देखील चर्चेत आहे.
भाजपकडून या पोटनिवडणुकीसाठी तीन नावांची चर्चा सुरू आहे. वास्तविक गिरीश बापट यांच्या सून स्वरदा बापट किंवा मुलगा गौरव बापट, पुण्याचे माजी महापैर मुरलीधर मोहळ, पुण्याचे माजी खासदार संजय काकडे, यांच्यासोबतच मेधा कुलकर्णी आणि शहराध्यक्ष जगदीश मुळीक यांची नावं चर्चेत होती. मात्र जगदीश मुळीक यांनी बापट यांच्या निधनानंतर लगेच आपल्या वाढदिवसानिमित्त झळकावलेल्या पोस्टरमध्ये स्वतःचा उल्लेख खासदार म्हणून केला होता. त्यामुळे त्यांच्या नावावर फुली पडली आहे. मेधा कुलकर्णी यांचं नाव देखील मागे पडलं आहे.
त्यामुळे स्वरदा बापट किंवा मुलगा गौरव बापट, माजी महापैर मुरलीधर मोहळ, माजी खासदार संजय काकडे यांची नावे आता चर्चेत आहेत. त्यापैकी एकाला तिकीट मिळणार असल्याची माहिती समोर येत आहे. निवडणूक आयोगाने पुणे लोकसभेसाठी निवडणुकीचा कार्यक्रम जाहीर केल्यास विधानसभा पोटनिवडणुकीसारखी लोकसभा पोटनिवडणूक देखील रंगतदार होण्याची शक्यता आहे.