मुंबई- शिवसेना आमदार मंगेश कुडाळकर यांच्या पत्नी रजनी मंगेश कुडाळकर यांनी काल , सोमवारी गळफास घेऊन आत्महत्या केल्याने खळबळ उडाली. आता या आत्महत्या प्रकरणाला वेगळेच वळण मिळाले असून त्यांच्या आत्महत्या करण्याला एक महिला जबाबदार असल्याचा एक मेसेज पोलीस तपासात पुढे आला आहे. त्यामुळे या प्रकरणाचे गूढ वाढले आहे.
मंगेश कुडाळकरांच्या पत्नी रजनी कुडाळकर यांनी आत्महत्या करण्याआधी केलेल्या एका मेसेजमुळे अनेक प्रश्न उपस्थित झाले आहेत. रजनी कुडाळकर यांनी आत्महत्येआधी आपल्यामुलाला एक मेसेज केला होता. या मेसेजमध्ये रजनी कुडाळकर यांनी आपल्या आत्महत्येला एक महिला जबाबदार असल्याचा त्यांनी उल्लेख केलेला आहे.
या मेसेजमध्ये राजांनी कुडाळकर यांनी लिहिलेले आहे की, आपलं काही बरं वाईट झालं , तर त्याला जबाबदार संबंधित महिला असेल. त्या महिलेचे नाव देखील त्यांनी लिहिलेले आहे. हा मेसेज पोलिसांच्या हाती लागला असून मुंबई पोलिस या दिशेने चौकशी करत आहेत. ती महिला नेमकी कोण ? तिचा रजनी कुडाळकर यांच्याशी काय संबंध ? रजनी कुडाळकर यांनी आत्महत्येसारखे टोकाचे पाऊल उचलण्यास संबंधित महिलेने का भाग पाडले ? असे अनेक प्रश्न या या मेसेजमुळे उपस्थित झाले आहेत. दरम्यान, नेहरूनगर पोलिसांनी रजनी कुडाळकर यांच्या मुलाचाही जबाब नोंदवून घेतला आहे.
शिवसेनेचे आमदार मंगेश कुडाळकर यांची पत्नी रजनी कुडाळकर यांनी मुंबईतील कुर्ला मधील नेहरूनगर येथील त्यांच्या निवासस्थानी गळफास लावून आत्महत्या केली. मंगेश कुडाळकर हे कुर्ला मतदारसंघाचे आमदार आहेत. रजनी कुडाळकर यांनी आत्महत्या केल्याची माहिती नेहरू नगर पोलीस ठाण्यात काल रात्री ९.१५ ते ९.३० वाजताच्या सुमारास पोलिसांना फोन केला. या घटनेची माहिती मिळताच पोलिसांनी घटनास्थळी धाव घेतली. पोलिसांनी रजनी कुडाळकर यांचा मृतदेह ताब्यात घेऊन राजावाडी रूग्णालयात शवविच्छेदनासाठी पाठवला.
