पुणे- महाराष्ट्र नवनिर्माण सेनेचे अध्यक्ष राज ठाकरे हे तीन दिवसीय पुणे दौऱ्यावर आहेत. अयोध्या दौऱ्यावर जाण्यापूर्वी त्यांची पुण्यात सभा होणार असल्याचे बोलले जात होते. आता या सभेची तारीख ठरली असून २१ मे रोजी डेक्कन येथील नदीपात्रातील मैदानात राज ठाकरेंची सभा होणार आहे. या सभेला पोलीस परवानगी देणार का, याबाबत राज्याचे गृहमंत्री दिलीप वळसे पाटील यांनी वक्तव्य केले आहे.
या सभेसाठी महाराष्ट्र नवनिर्माण सेनेने पुणे पोलिसांकडे परवानगी मागितली आहे. मात्र, पोलीस या सभेसाठी परवानगी देणार की नाही, याबाबत साशंकता आहे. याविषयी राज्याचे गृहमंत्री दिलीप वळसे-पाटील यांना विचारणा करण्यात आली. राज ठाकरे यांच्या पुण्यातील सभेला परवानगी देणार का, असा प्रश्न त्यांना विचारण्यात आला.
त्यावर गृहमंत्र्यांनी म्हटले की, राज ठाकरे यांच्या पुण्यातील सभेला परवानगी नाकारण्याचे कारण दिसत नाही. पोलीस आयुक्त या सभेला परवानगी देतील. मात्र, मनसेने पोलीस आयुक्तांनी घालून दिलेल्या नियमांचे पालन करावे, असे वळसे-पाटील यांनी सांगितले. ते मंगळवारी मुंबईत प्रसारमाध्यमांशी बोलत होते. राज ठाकरे हे आजपासून पुण्याच्या दोन दिवसीय दौऱ्यावर आहेत. ते पुण्याच्या दिशेने रवाना झाले आहेत.
पुण्यातील भाजप-राष्ट्रवादी हाणामारीवर गृहमंत्री म्हणाले…
सोमवारी पुण्यात केंद्रीय मंत्री स्मृती इराणी यांच्या कार्यक्रमाच्या दरम्यान भाजप आणि राष्ट्रवादी काँग्रेसच्या पदाधिकाऱ्यांमध्ये हाणामारी झाली. राष्ट्रवादी महिला कार्यकर्त्यांना भाजप कार्यकर्त्यांनी मारहाण केल्याचा आरोप आहे. त्यावर गृहमंत्री दिलीप वळसे पाटील म्हणाले की, पोलीस योग्य ती कारवाई करतील. राष्ट्रवादीच्या कार्यकर्त्यांनी चूक केली असेल तर त्यांच्यावर कारवाई होईल. भाजपच्या कार्यकर्त्यांची चूक असेल त्यांच्यावर कारवाई होतील. भाजपच्या पुरुष पदाधिकाऱ्यांनी राष्ट्रवादीच्या महिला कार्यकर्त्याला मारहाण करणे ही आक्षेपार्ह बाब आहे.