मुंबई : ” लोक सध्याच्या राजकारणाला वैतागले आहेत . त्यामुळे ही अस्थिरता एक संधी आहे . लोक आपला विचार करत आहेत . म्हणून आपण त्यांच्यापर्यंत पोहोचणं गरजेचं आहे . सदस्यता नोंदणीच्या माध्यमातून त्यांच्यापर्यंत जा , पक्ष संघटना वाढवा…!” अशा सूचना मनसे अध्यक्ष राज ठाकरे यांनी कार्यकर्ते आणि पदाधिकाऱ्यांना दिल्या आहेत .
त्यामुळे दोन महिन्याच्या विश्रांतीनंतर राज ठाकरे यांनी दमदार कमबॅक केले आहे. राज ठाकरे यांच्या हिप बोनवर शस्त्रक्रिया पार पडली . त्यानंतर त्यांना डॉक्टरांनी दोन महिने विश्रांतीचा सल्ला दिला होता . त्यानंतर आता पुन्हा एकदा राज ठाकरे ऍक्टिव्ह मोडवर आले आहेत.
महापालिका आणि स्थानिक स्वराज्य संस्थांच्या निवडणुका तोंडावर असल्याकारणाने मनसेची सदस्य नोंदणी लवकरच सुरू होणार आहे . दरम्यान या निवडणुका स्वबळावर लढणार की भाजपसोबत लढणार यावर देखील लवकरच निर्णय घेतला जाण्याची शक्यता आहे . या संदर्भात राज ठाकरे यांनी पदाधिकाऱ्यांना चाचपणी करण्याच्या सूचना देखील दिल्या असल्याचे समजते.
