सुरत न्यायालयाने राहुल गांधी यांना मानहानीच्या प्रकरणात दोषी ठरवलं आणि त्यांना दोन वर्षांची शिक्षा सुनावली. त्यानंतर लोकसभा सचिवालयाने कारवाई करत त्यांची खासदारकी रद्द केली. त्यामुळे वायनाड या त्यांच्या मतदारसंघात पोटनिवडणूक होणार का ? असा प्रश्न विचारला जात होता. त्यावर मुख्य निवडणूक आयुक्त राजीव कुमार यांनी माहिती दिली आहे.
आज, कर्नाटक विधानसभा निवडणुकीची तारीख जाहीर करताना निवडणूक आयोगानं चार विधानसभा जागांसाठी आणि एका लोकसभेच्या जागेसाठी पोटनिवडणूक जाहीर केली. परंतु, वायनाड जागेसाठी निवडणूक जाहीर केली नाही. वायनाड मतदारसंघातून राहुल गांधींचं सदस्यत्व रद्द केल्यानंतर पोटनिवडणुकीची घोषणा करण्यासाठी आमच्याकडं 6 महिन्यांचा कालावधी आहे. आताच आम्ही घाई करणार नाही. त्यांच्याकडं अपील करण्यासाठी 30 दिवसांचा कालावधी आहे.’ असं राजीव कुमार म्हणाले.
राहुल गांधींनी कर्नाटकात भाषणादरम्यान ‘मोदी’ आडनावावर भाष्य केलं होतं. त्यानंतर 2019 मध्ये गुजरातमधील सुरत येथील भाजप आमदारानं त्यांच्यावर मानहानीचा खटला दाखल केला होता. शुक्रवार, 24 मार्च रोजी सुरत कोर्टानं राहुल गांधी यांना मानहानीच्या प्रकरणात दोषी ठरवलं आणि त्यांना दोन वर्षांची शिक्षा सुनावली.
