पुणे- कल्याण डोंबिवली, नवी मुंबई ,उल्हासनगर, वसई-विरार, ठाणे, अमरावती, नागपूर, नाशिक, बृहमुंबई, सोलापूर आणि पिंपरी- चिंचवड या महानगरपालिकांच्या सार्वत्रिक निवडणुकांसाठी नव्या वेळापत्रकानुसार प्रभागनिहाय प्रारूप मतदार याद्या येत्या 23 जून या दिवशी प्रसिद्ध केल्या जाणार आहेत.
महापालिका निवडणुकीसाठी 17 जून रोजी मतदार याद्यांचा कार्यक्रम जाहीर केला होता. पण आता या वेळापत्रकामध्ये निवडणूक आयोगाने बदल केले आहेत. त्यानुसार आता येत्या गुरुवारी (२३ जून) रोजी प्रसिद्ध केल्या जाणार आहेत, तर 23 जून ते 1 जुलै पर्यंत हरकती व सूचना दाखल करण्यात येतील अशी माहिती राज्य निवडणूक आयोगाने दिली आहे.
यानंतर अंतिम मतदारयाद्या 9 जुलै रोजी प्रसिद्ध केल्या जाणार आहेत. राज्यातील 14 महापालिकेच्या सार्वत्रिक निवडणुकांसाठी 31 मे 2022 रोजी अनुसूचित जाती, जमाती व महिला आरक्षणाची सोडत झाली. यानंतर राज्य निवडणूक आयोगाने सर्व महापालिकांना प्रभागनिहाय मतदारयाद्या तयार करण्याचे आदेश दिले. महापालिका निवडणुकीसाठी प्रारूप प्रभागरचनेवरील हरकती व सुचनांतर 13 मे रोजी प्रभागरचना अंतिम करण्यात आली. प्रभाग रचना अंतिम करताना प्रभागमध्ये बदल झाले असून मतदार संख्येतही बदल झाले आहेत.