पुणे : इकडं पुण्याचे नवनियुक्त पोलीस आयुक्त म्हणून रितेश कुमार यांनी पदभार स्वीकारला आणि रात्री वारज्यातील रामनगरमधील वेताळबाबा चौकात गोळीबार झाला. या घटनेमुळं वारजे परिसरात एकच खळबळ उडालीये. या घटनेचा थरार सीसीटीव्ही कॅमेऱ्यात कैद झालाय.
कार्तिक इंगवले असं गोळीबार करणाऱ्या आरोपीचं नाव असून तो रेकॉर्डवरील गुन्हेगार आहे. काल शुक्रवारी रात्री फिर्यादी योगेश चंद्रकांत डोळसे हा तरुण दुचाकीवरून त्याच्या घरी जात होता. त्याचवेळी कार्तिक इंगवले हा त्याच्या मित्रासह दुचाकीवरून रामनगरच्या दिशेनं जात होता. रामनगर येथील मारुती मंदिराजवळ आरोपी आणि फिर्यादी जवळ आले असता इंगवले यानं फिर्यादीकडं पाचशे रुपयांची मागणी केली.
त्यावर फिर्यादीनं माझ्याकडं पैसे नाहीत, असं सांगितलं. पैसे न दिल्यानं आरोपी इंगवले यानं पाठलाग करून रामनगर येथील वेताळबाबा चौकात योगेश डोळसेवर गोळी झाडली. सुदैवानं यात फिर्यादी थोडक्यात बचावला. गोळीबारानंतर इंगवले यानं तिथून पळ काढला. या गोळीबारात तरुणासह रस्त्यावरून जाणारा एक अल्पवयीन मुलगा बचावला. याप्रकरणी योगेश चंद्रकांत डोळसे यानं वारजे पोलिस ठाण्यात फिर्याद दिलीये. कार्तिक इंगवले हा सराईत गुन्हेगार असून तो नुकताच मोक्का कारवाईतून तुरुंगातून बाहेर आला आहे.
भर रस्त्यात गोळीबार करण्यापर्यंत गुन्हेगारांची मजल जातेच कशी ? सीआयडीचे अपर पोलीस महासंचालक म्हणून काम केलेल्या रितेश कुमार यांनी पुणे पोलीस आयुक्त म्हणून पदभार स्वीकारल्याच्या पहिल्याच दिवशी ही गोळीबाराची घटना घडली. त्यामुळं या अशा सराईत गुंडांना वठणीवर आणण्याचं आव्हान रितेश कुमार यांच्यासमोर असणार आहे.