मुंबई : केंद्रीय वित्त मंत्रालयाच्या सार्वजनिक वित्तीय व्यवस्थापन प्रणाली (PFMS) विभागाने आज मुंबईत छत्रपती शिवाजी महाराज आंतरराष्ट्रीय विमानतळ, ताज सांताक्रूझ,येथे बँकांच्या कामगिरीसंदर्भात आढावा बैठक आणि स्वातंत्र्याच्या अमृत महोत्सवानिमित्त राज्य सरकारांसोबत बैठक घेतली. व्यय विभागाअंतर्गत असलेल्या लेखा नियंत्रक कार्यालयाच्या पीएफएमएस विभागाच्या अतिरिक्त लेखा महानियंत्रक धरित्री पांडा या बैठकीच्या अध्यक्षस्थानी होत्या.
या बैठकीत केंद्र पुरस्कृत योजनांच्या निधी वितरणा संदर्भातली नवीन पद्धत आणि सार्वजनिक वित्तीय व्यवस्थापन प्रणाली बरोबर कोषागार समन्वयन या मुद्द्यांवर विस्तृत चर्चा झाली. राज्य सरकारांनी सार्वजनिक वित्तीय व्यवस्थापन प्रणालीला माहितीची देवाणघेवाण वेळेवर करावी जेणेकरून विश्वासार्ह आणि अचूक आर्थिक अहवाल सुनिश्चित होईल आणि या प्रणालीत कोणत्याही त्रुटी राहणार नाहीत, यावर या बैठकीत भर देण्यात आला.
बँकिंग प्रणालीला नवीन बदलांना आत्मसात करता यावे या उद्देशाने महत्वाचे प्रमुख कामगिरी निर्देशक (KPIs) आणि एकल नोडल खाती या मुद्द्यांवर बँकांच्या कामगिरी बद्दलच्या आढावा बैठकीत अधिक भर देण्यात आला. या बैठकीला सह लेखा महानियंत्रक, पीएफएमएस विभाग, नवी दिल्ली, अमिताभ त्रिपाठी, एनआयसी- पीएफएमएस चे तंत्रज्ञ आणि गुजरात, मध्य प्रदेश, महाराष्ट्र आणि राजस्थानचे राज्य वित्त अधिकारी देखील उपस्थित होते. बँक ऑफ महाराष्ट्र, स्टेट बँक ऑफ इंडिया, बँक ऑफ बडोदा, एचडीएफसी बँक, आयसीआयसीआय बँक, आरबीएल बँक, कोटक महिंद्रा बँक, अॅक्सिस बँक, सेंट्रल बँक ऑफ इंडिया, बँक ऑफ इंडिया, पंजाब अँड सिंध बँक, येस बँक आणि इंडसइंड बँक, या 13 प्रमुख बँका,बँकिंग पुनरावलोकनात सहभागी झाल्या होत्या.
