मुंबई – आगामी मुंबई महापालिका निवडणुकीच्या तोंडावर भाजपकडून पोलखोल अभियान राबविण्यात येत आहे. त्यासाठी पोलखोल अभियान पोलखोल रथ तयार करण्यात आलेला आहे. हा रथ मुंबईत फिरविण्यात येत आहे. दरम्यान, चेंबूरमध्ये या पोलखोल अभियान गाडीची रात्री तोडफोड करण्यात आली.
आजपासून चेंबूरमधून भाजपच्या पोलखोल अभियान उदघाटन होणार होते. त्याआधीच गाडीवर अज्ञात लोकांनी दगड मारत तोडफोड केल्याचे समोर आले आहे. शिवसेनेकडून हा भ्याड हल्ला करण्यात आल्याचा आरोप या कार्यक्रमाचे आयोजक राजेश शिरवाडकर यांनी केला आहे. आम्ही अशाने घाबरणारे नाहीत. त्यांची पोलखोल करणार,असा इशारा यावेळी भाजपकडून देण्यात आला आहे.
तोडफोडीच्या या घटनांमुळे भाजप नेते आक्रमक झाले आहेत. शिवसैनिक तसेच महाविकास आघाडीच्या कार्यकर्त्यांचाच यामागे हात असल्याचा संशय भाजप नेते व विधान परिषदेचे विरोधी पक्षनेते प्रवीण दरेकर यांनी व्यक्त केला आहे. आमच्या पोलखोल अभियान प्रचार रथाची तोडफोड विरोधकांकडून करण्यात आली आहे. शिवसेनेचा पालिकेतील कारभार सगळ्यांनाच माहित आहे. आम्ही लोकशाही पद्धतीने हा विरोध करत आहोत. आंदोलन करत आहोत. तो आमचा अधिकार आहे. पोलिसांनी अर्ध्या तासात आरोपींना न पकडल्यास पोलिस स्टेशनसमोर ठिय्या आंदोलन करणार. तसेच, यामुळे कायदा-सुव्यवस्थेचा प्रश्न निर्माण झाल्यास त्याला पोलिसच जबाबदार असतील, असा इशाराही त्यांनी दिला आहे.
पोलिसांना वरिष्ठांकडून तपास रोखण्याचे आदेश येऊ शकतात. यासंदर्भातील सीसी टीव्ही फुटेजही गायब होण्याची शक्यता आहे. त्यामुळे पोलिसांना लवकरात लवकर आरोपींना पकडण्याचे आवाहन केल्याचे प्रवीण दरेकर यांनी म्हटले आहे.