पुणे : सहाय्यक पोलीस आयुक्त संदीप कर्णिक यांनी एका पोलीस कर्मचाऱ्यासह सहाय्यक पोलीस निरीक्षकाचे तडकाफडकी निलंबन केले आहे. मिळालेल्या धक्कादायक माहितीनुसार वरिष्ठांची कोणतीही परवानगी न घेता मोक्कातील आरोपीला लॉकअप बाहेर काढून घर झडती घेण्यासाठी म्हणून घेऊन जात असताना आरोपी पलायन करण्यास मदत केल्याचा ठपका ठेवून या सहाय्यक पोलीस निरीक्षकाचे आणि पोलीस कर्मचाऱ्यांचे तडकाफडकी निलंबन करण्यात आले आहे.
सहाय्यक पोलीस निरीक्षक रामदास झुंबर मुंडे आणि पोलीस नाईक महेश राजेंद्र जाधव अशी निलंबित करण्यात आलेल्यांची नावे आहेत. काही दिवसांपूर्वी मार्केट यार्ड येथील आंगडिया कार्यालयात शिरून अविनाश गुप्ता आणि त्याच्या टोळीने गोळीबार केला होता. त्यानंतर 28 लाख रुपये लुटून नेले होते. यातील आरोपींना पोलिसांनी अटक केली होती. तसेच त्यांच्यावर पोलीस आयुक्त रितेश कुमार यांनी मोक्का अंतर्गत कारवाई केली होती.
रामदास मुंडे आणि महेश जाधव यांनी यातील नऊ आरोपींपैकी संतोष पवार आणि साई कुंभार यांना वरिष्ठांची कोणतीही परवानगी न घेता पोलीस कोठडीतून बाहेर काढले. त्यानंतर घराची झाडाझडती घेण्यासाठी खानापूर येथे घेऊन जात असताना संतोष पवार हा पळून गेला. यावेळी कोणताही पुरेपूर पोलीस बंदोबस्त न घेता पोलीस कर्तव्यात जबाबदार आणि बेफिकीर गैरवर्तन केल्याचा ठपका ठेवून सहाय्यक पोलीस आयुक्त संदीप कर्णिक यांनी या दोघांवर निलंबनाची कारवाई केली आहे.
