नवी दिल्ली- आजच्या शिवसेनेच्या सभेचा टिझर पाहिला. त्यात उद्धव ठाकरे म्हणतात ‘तुम्ही मला वज्रमूठ द्या, दात पाडण्याचं काम मी करतो’. जर इतकी ताकद आहे तर औरंगजेबाच्या कबरीवर फुलं वाहणाऱ्यांचे दात आधी तोडून दाखवा तर तुम्हाला मानेल. असे म्हणत नवनीत राणा यांनी पुन्हा एकदा मुख्यमंत्री उद्धव ठाकरेंना आव्हान दिले आहे. दिल्लीतील कॅनॉट प्लेस येथील हनुमान मंदिरात हनुमान चालिसाचे पठण करण्यापूर्वी प्रसारमाध्यमांशी त्या बोलत होत्या. यावेळी रवी राणा उपस्थित होते.
नवनीत राणा म्हणाल्या, “राणा दाम्पत्य कोणाच्याही रिमोट कंट्रोलने चालणाऱ्यांपैकी नाही. भाजपच्याही नाही. आज आपण महाराष्ट्रातील जनतेला मुख्यमंत्री उद्धव ठाकरेंपासून मुक्त करण्यासाठी हनुमान चालीसाचे पठण करत आहोत. मी तुरुंगात असताना दररोज 101 वेळा हनुमान चालिसाचा पाठ करायची. कोणत्याही निर्दोषाने तुरुंगात जावे असे मला वाटत नाही”
नवनीत राणा यांनी पुढे म्हटले,”उद्धव ठाकरेंच्या माध्यमातून महाराष्ट्रावर संकट आलेलं आहे. हे संकट दूर करण्यासाठी आणि महाराष्ट्राच्या विकासासाठी मी प्रयत्न करत राहणार आहे. ज्या-ज्या ठिकाणी हनुमान चालीसा मला बोलता येईल त्या ठिकाणी मी बोलणार. मला बंद करण्यासाठी 14 दिवस कमी पडतील. दिल्लीतील हे एक प्राचीन मंदिर आहे आणि त्यामुळे आम्ही येथे महाआरती करत आहोत”
“आजच्या शिवसेनेच्या सभेचा टिझर पाहिला. त्यात उद्धव ठाकरे म्हणतात तुम्ही मला वज्रमूठ द्या, दात पाडण्याचं काम मी करतो. जर इतकी ताकद आहे तर औरंगजेबाच्या कबरीवर फुलं वाहणाऱ्यांचे दात आधी तोडून दाखवा तर तुम्हाला मानेल” या शब्दात नवनीत राणा यांनी उद्धव ठाकरे यांना आव्हान दिले आहे.
कॅनॉट प्लेस येथील हनुमान मंदिरात हनुमान चालिसाचे पठण
हनुमान चालिसा पठण तसेच महाआरती करण्यासाठी राणा दाम्पत्य आज सकाळी साडेनऊ वाजण्याच्या दरम्यान, दिल्ली येथील त्यांच्या घरापासून पायी हनुमान मंदिरात पोहचले, हे मंदिर त्यांच्या घरापासून सुमारे 2 ते 2.5 किलोमीटर अंतरावर आहे. उद्धव ठाकरे सरकारपासून सुटका करण्यासाठी हनुमान चालीसा पाठ करतील, असे राणा म्हणाले होते. यावेळी भगवे झेंडे घेऊन समर्थकांसह राणा यांनी पदयात्रा करत ते हनुमान मंदिरात पोहचले.
