नाशिक : नाशिकमध्ये गुरुवारी नगरसेवकाच्या मुलानं हवेत गोळीबार केल्याची घटना घडली आहे. शिंदे गट आणि ठाकरे गटामध्ये झालेल्या वादंगातून हा प्रकार घडला. मिळालेल्या सविस्तर माहितीनुसार, शिवसेनेतील बंडखोरीनंतर दोन गट पडले. या गटामध्ये अद्याप देखील बाचाबाची सुरूच आहे.
गुरुवारी नाशिकमध्ये देखील असाच प्रकार घडला. मुख्यमंत्री एकनाथ शिंदे यांच्या गटात अनेक नेत्यांनी प्रवेश केला. शिवजयंतीच्या पार्श्वभूमीवर देवळालीमध्ये सर्वपक्षीय बैठकीमध्ये अध्यक्षपदावरून दोन गट आमने-सामने आले होते. यावेळी दोन गटांमध्ये झालेल्या वादंगानंतर शिंदे गटाचे पदाधिकारी सूर्यकांत लवटे यांच्या मुलाने हवेत गोळीबार केल्याचा प्रकार घडला आहे.
गुरुवारी नाशिकमधील देवळाल परिसरात ही घटना घडली. या घटनेनंतर परिसरात बऱ्याच वेळ तणावाच वातावरण निर्माण झालं होतं. घटनेनंतर पोलिसांनी स्वप्निल लवटे यास ताब्यात घेतला आहे. व स्वप्निल लवटे याच्यावर गुन्हा देखील दाखल करण्यात आला आहे.
