शिंदे फडणवीस सरकार सरकारला सत्तेपासून खाली खेचण्यासाठी महाविकास आघाडीच्या नेत्यांनी सर्व शक्तीनिशी लढा पुकारला आहे. राज्यभरात सभांचा धडाका लावून शिंदे सरकारला पळता भुई थोडी करायचा निश्चय केला आहे. त्यानुसार काँग्रेस, राष्ट्रवादी काँग्रेस आणि उद्धव ठाकरे यांची शिवसेना एकत्र येऊन राज्यभरात सभा घेत आहेत. त्यापैकी संभाजीनगरमध्ये पहिली संयुक्त सभा झाली होती. आता मे महिन्यात पुण्यात सभा होत आहे.
या सभेच्या नियोजनासाठी शनिवारी महाविकास आघाडीच्या पुणे शहरातील नेत्यांची बैठक झाली. बैठकीत सभेसंदर्भात अनेत महत्वाचे निर्णय घेतले गेले. पुणे शहरातील नाना पेठेतील डॉ. बाबासाहेब आंबेडकर महाविद्यालयाच्या प्रांगणात 14 मे 2023 रोजी रविवारी ही सभा घेण्याचा निर्णय महाविकासआघाडीने घेतला आहे. महाविकास आघाडीचे सर्व नेते या सभेला उपस्थित राहणार आहेत. या सभेची जबाबदारी स्वतः अजित पवार यांच्यावर असणार आहे.
उद्धव ठाकरे यांना विशेष खुर्ची मिळणार का ?
संभाजीनगर मध्ये झालेल्या सभेत उद्धव ठाकरेंना देण्यात आलेल्या खुर्चीवरून बरीच चर्चा झाली होती. उद्धव ठाकरे यांना पाठीचा त्रास असल्याने तशा प्रकारची खुर्ची देण्यात आली होती असे स्पष्टीकरण अजित पवार यांना द्यावे लागले होते. मात्र पुण्यातील सभेत कुठलाही मानपान होणार नाही. आम्ही सगळे एकाच प्लॅटफॉर्मवर असू, असे स्पष्टीकरण राष्ट्रवादी काँग्रेसचे शहराध्यक्ष प्रशांत जगताप व काँग्रेसचे शहराध्यक्ष अरविंद शिंदे यांनी दिले.
महाविकास आघाडीच्या सभेचा कार्यक्रम
16 एप्रिल 2023 रोजी दुसरी सभा- नागपूर, सुनील केदारे यांच्यावर या सभेची जबाबदारी
1 मे 2023 रोजी तिसरी सभा- मुंबई, आदित्य ठाकरे यांच्यावर या सभेची जबाबदारी
14 मे 2023 रोजी चौथी सभा- पुणे, अजित पवार यांच्यावर या सभेची जबाबदारी
28 मे 2023 रोजी पाचवी सभा- कोल्हापूर, सतेज उर्फ बंटी पाटील यांच्यावर या सभेची जबाबदारी
3 जून 2023 रोजी सहावी सभा- नाशिक, छगन भुजबळ यांच्यावर या सभेची जबाबदारी
6 जून 2023 रोजी सातवी सभा- अमरावती, यशोमती ठाकूर यांच्यावर या सभेची जबाबदारी