चिंचवड : आज चिंचवड विधानसभा पोटनिवडणुकीचा निकाल जाहीर होणार आहे. दरम्यान सकाळी सात वाजल्यापासून मतमोजणीला सुरुवात झाली आहे. या मतमोजणी प्रक्रियेमध्ये आत्तापर्यंत भाजपच्या अश्विनी जगताप आघाडीवर असल्याचे दिसून येते आहे.
#Latest Updates : चिंचवडमध्ये भाजपच्या अश्विनी जगताप गड राखणार ? वाचा आतापर्यंतचा निकाल
दरम्यान या निकालाविषयी माध्यमांशी बोलताना दिवंगत आमदार लक्ष्मण जगताप यांच्या पत्नी आणि भाजपच्या उमेदवार अश्विनी जगताप यांनी भावनिक प्रतिक्रिया व्यक्त केली आहे. यावेळी माध्यमांशी बोलताना त्या म्हणाल्या की, लक्ष्मण जगताप यांच्या निधनामुळे निकालाकडे बघताना फारसा उत्साह वाटत नाही. मला आज साहेबांची खुप आठवण येत आहे. निकालाकडे बघताना तसा फार उत्साह नाही, पण लोकांना न्याय द्यावा, त्यांच्या पाठीवर हात फिरवणारे कुणी असावे, त्यांची कामे वेळच्यावेळी व्हावीत, त्यांना भक्कम आधार देणारे कुणीतरी असावे यासाठी खरेतर मी निवडणुकीसाठी उभी राहिले.
ही साहेबांनी केलेल्या कामाची पावती आहे. भाजपाचे सर्व नगरसेवक, कार्यकर्ते, मुख्यमंत्री, उपमुख्यमंत्री यांनी इथे येऊन मला पाठिंबा दिला, सभा घेतल्या. भाजपाचे भारतातून कार्यकर्ते आले होते. त्यांना मी धन्यवाद देईन.असे त्या म्हणाल्या.
“ही निवडणूक प्रतिष्ठेची होती. लक्ष्मण जगताप यांनी तेवढा विकास केला आहे. त्यांच्या आकस्मिक जाण्यामुळे ही निवडणूक लागली. इतक्या लवकर निवडणूक लागेल असं वाटलं नव्हतं. विरोधकांनी फॉर्म भरल्यामुळे आमच्या सगळ्यांवर भार पडायला लागला. बिनविरोध झाली असती निवडणूक तर चांगलं झालं असतं”, असेही यावेळी अश्विनी जगताप म्हणाल्या आहेत.