पुणे : गौतमी पाटील हे नाव आज महाराष्ट्रासाठी फारसं नवीन राहिलेलं नाही. महाराष्ट्राची ओळख असलेले लावणी नृत्य करण्यासाठी गौतमी पाटील प्रसिद्ध आहे. पण तिच्या काही स्टेज परफॉर्मन्समध्ये तिने अश्लील हावभाव केल्यामुळे ती चांगलीच वादाच्या भोवऱ्यात सापडली होती. तिचे हे अश्लील भावभाव केलेले व्हिडिओ सोशल मीडियावर जोरदार व्हायरल झाले, आणि त्यानंतर तिचे कार्यक्रम बंद केले जावेत असा एक सूर उमटत होता.
त्यानंतर गौतमी पाटील हिने जाहीर माफी देखील मागितली होती. दरम्यान टीव्ही ९ या मराठी वृत्तवाहिनीशी गौतमी पाटील हिने संवाद साधला यावेळी ती म्हणाली की, “माझ्या कार्यक्रमांना विरोध का केला जातोय मला माहित नाहीये, माझ्या कार्यक्रमांवर बंदी आणण्याचं काही कारण नाही. माझ्या नृत्यात कुठेही अश्लीलता नाही. आधी जे झालं त्याबद्दल मी माफी मागितली आहे. लोकांना माझ्यावर आणि माझ्या कार्यक्रमावर प्रेम आहे. त्यामुळे माझ्या कार्यक्रमांना गर्दी होत असते. मला महाराष्ट्राची सपना चौधरी म्हणत असतील तर ती चांगली गोष्ट आहे. कारण सपना चौधरी नाव मोठं आहे. माझ्या कार्यक्रमांमुळे प्रस्थापित अभिनेत्री नाराज असतील असं मला वाटत नाही अशी थेट प्रतिक्रिया गौतमीने दिली आहे.
