ठाणे- अभिनेत्री केतकी चितळे प्रकरणाला आता नवे वळण मिळाले आहे. केतकी हिने राष्ट्रवादीचे अध्यक्ष शरद पवार यांच्याबाबत अत्यंत वादग्रस्त अशी पोस्ट फेसबुकवर शेअर केली होती. मात्र, तिने जो मेसेज फेसेज पोस्टवर शेअर केला होता, तो कुणी तरी पाठवला अथवा एखाद्या ग्रुपवरून आला होता, अशा संशय पोलिसांनी व्यक्त केला आहे.
अभिनेत्री केतकी चितळे हिने शरद पवार यांच्याबाबत अत्यंत वादग्रस्त पोस्ट फेसबुकवर शेअर केली होती. या प्रकरणी तिच्या विरोधात गुन्हा दाखल झाला होता. तिला कळवा पोलिसांनी ताब्यात घेऊन तिला अटक केली. पोलीस कोठडीची मुदत संपल्याने आज तिला ठाणे न्यायालयात हजर करण्यात आले होते. आज ठाणे न्यायालयाने तिला १४ दिवसांची न्यायालयीन कोठडी सुनावली आहे. या गुन्ह्याचा तपास गुन्हे शाखा करत होती. आज पोलीस कोठडीचा शेवटचा दिवस असल्याने तिला न्यायालयात हजर करून तिची वैद्यकीय तपासणी करण्यात आली.
केतकी चितळेने फेसबुकवर पोस्ट टाकली त्याबद्दल सायबर सेलच्या मदतीने तपास केला जात आहे. पोलिसांनी तिचा लॅपटॉप आणि मोबाईल ताब्यात घेतला आहे. त्याची तपासणी केली असता केतकीने मोबाईलमधील मेसेज डिलीट केले असल्याचे समोर आले आहे. यासाठी तिचा मोबाईल फॅारेन्सिक चाचणीकरता पाठवणार आहे. तसंच तिने फेसबुकवर केलेली पोस्ट ही २०२० ची पोस्ट तिने आता का केली याचा शोध घेतला जाणार आहे, अशी माहिती सूत्रांनी दिली आहे.
पोलिसांना संशय आहे की, केतकीला कोणा एका व्यक्तीनं अथवा ग्रुपने ती पोस्ट दिली आहे, त्याचा तपास पोलीस करत आहेत.
केतकी व्हॉटसअॅप वापरत नव्हती मात्र ती सोशल मीडियावर नेहमी अॅक्टिव्ह असते. त्यामुळे ती इतरांशी संपर्कात राहण्यासाठी कोणत्या माध्यमाचा वापर करत होती याचा देखील पोलीस तपास करणार आहेत.
