पंढरपूर : कार्तिकी एकादशीला पंढरपूरमध्ये विठ्ठलाच्या शासकीय महापुजेचा मान कोणाला द्यायचा यावर पेच निर्माण झाला होता. मराठा आरक्षणाच्या मुद्द्यावरून सकल मराठा समाजाने आक्रमक होत मंदिर समितीच्या बैठकीवेळी जोरदार घोषणाबाजी केली होती. तसंच उपमुख्यमंत्र्यांच्या हस्ते होणारी पुजा रोखण्याचा इशाराही देण्यात आला होता. आता विठ्ठल रुक्मिणी मंदिर समितीने याबाबत निर्णय घेतला आहे. यावर्षी कार्तिकी एकादशीला कोणत्याच उपमुख्यमंत्र्यांना निमंत्रण देण्यात येणार नसल्याचे मंदिर प्रशासनाकडून स्पष्ट करण्यात आले आहे
आषाढी एकादशीला मुख्यमंत्र्यांच्या हस्ते तर कार्तिकी एकादशीला उपमुख्यमंत्र्यांच्या हस्ते शासकीय पुजा केली जाते. दरम्यान, राज्यात आता दोन उपमुख्यमंत्री आहेत. त्यामुळे अजित पवार की देवेंद्र फडणवीस, कोणाच्या हस्ते शासकीय महापुजा होणार असा प्रश्न होता. यावर निर्णय घेण्यासाठी मंदिर समितीने बैठक बोलावली होती.
महापुजेचा पेच सोडवण्यासाठी बैठक सुरु असताना मराठा आरक्षणाच्या मुद्द्यावरून सकल मराठा समाजाकडून घोषणाबाजी करण्यात आली. उपमुख्यमंत्र्यांच्या महापुजेला सकल मराठा समाजाने विरोध केला आहे. त्यावरूनच आजच्या बैठकीत सकल मराठा समाजाने गोंधळ घातला. दोन्हीही उपमुख्यमंत्र्यांना आमंत्रण देऊ नये अशी मागणी मराठा समाजाकडून करण्यात आली होती.
