अभिनेत्री जिया खान मृत्यूप्रकरणी अभिनेता आदित्य पांचोली याचा मुलगा सुरज पांचोली याची निर्दोष मुक्तता करण्यात आली आहे. सबळ पुराव्याच्या अभावी सूरजची निर्दोष मुक्तता करण्यात आली. कोर्टानं जियाची आई राबिया खान यांचा अर्ज फेटाळला असून या निकालाला राबिया खान आव्हान देऊ शकतात असे कोर्टाने म्हटले आहे.
3 जून रोजी 2013 रोजी जिया खान मुंबईतील तिच्या घरात मृतावस्थेत आढळून आली होती. तिच्या मृत्यूमुळे बॉलिवूडमध्ये एकच खळबळ उडाली होती. या मृत्यूप्रकरणात सूरज पांचोलीचं नाव आले होते. जियाला आत्महत्या करण्यास प्रवृत्त केल्याचा आरोप जियाची आई राबिया खान हिने सुरजवर आरोप ठेवला होता. सूरजच्या सांगण्यावरूनच जियाने गर्भपात केल्याचा दावाही जियाच्या आईने केला होता. तिने सुरजच्या विरोधात तक्रार दिली होती. या प्रकरणाचा तपास आधी मुंबई पोलीस करत होते आणि त्यानंतर या प्रकरणाचा तपास सीबीआयकडे सोपवण्यात आला होता.
जिया खानने आत्महत्या केली तेव्हा तिच्याकडे सुसाईड नोट सापडली होती. त्यात तिने सूरजसोबत आपले प्रेम असल्याचं स्पष्ट केले होतं. मात्र, सूरजने आपल्याशी चुकीचे वर्तन करण्यास सुरुवात केली होती. सूरजने एकदा मला घरातून बाहेरही काढलं होतं. त्याच्या या वागण्याने मी दुःखी झाले होते, असे सुसाईड नोटमध्ये म्हटले होते.
२० एप्रिल रोजी न्यायाधीश एएस सय्यद यांच्या खंडपीठाने दोन्ही बाजूंचा अंतिम युक्तिवाद ऐकून घेत अंतिम निकाल राखून ठेवला होता. तब्बल १० वर्षांनी या प्रकरणी आज न्यायालयाने अंतिम निकाल दिला आहे. या निकालानंतर सुरजची आई झरीना वहाब यांनी सुटकेचा निश्वास टाकला आहे. मात्र जियाची आई राबिया खान हिने कोर्टाच्या निर्णयावर आपली नाराजी व्यक्त केली आहे.