मुंबई-अहमदाबाद मार्गावर धावणारी हायस्पीड बुलेट ट्रेन समुद्राखालील बोगद्यामधून धावणार आहे. लवकरच देशातील पहिल्या अंडर सी बोगद्याच्या कामाला सुरवात होणार आहे. मुंबईतील वांद्रे-कुर्ला कॉम्प्लेक्स (बीकेसी) ते ठाण्यातील शिळफाटा या मार्गावर असणार्‍या २१ किमी लांबीच्या बोगद्यासाठी अॅफकॉन्सने सर्वात कमी किमतीची बोली लावल्याची माहिती समोर आली आहे.
मान्सूनपूर्वीच या कामाचा शुभारंभ होण्याची शक्यता वर्तवली जात आहे. बुलेट ट्रेनवरील बीकेसी आणि शिळफाटा स्थानकांदरम्यान ठाणे खाडीवर हा बोगदा असेल. बीकेसी ते शिळफाटा हे अंतर जवळपास ३५ किलोमीटर इतके आहे. वर्क ऑर्डर निघाल्यानंतर, बोगदा पूर्ण होण्यासाठी सुमारे पाच वर्षांचा कालावधी लागण्याचा अंदाज आहे.
२०२८ ही मुंबई-अहमदाबाद मार्गावरील या बोगद्याची डेडलाईन आहे. या प्रकल्पाच्या बांधकामाचा पहिला टप्पा पूर्ण होण्यास आणखी किमान तीन वर्षांचा कालावधी लागण्याची चिन्हं आहेत. या संपूर्ण कामास ६४०० कोटी रुपयांचा खर्च अपेक्षित आहे. बोगद्याच्या २१ किमी पैकी १४ किमी अंतर अंडरग्राऊण्ड जमिनीखाली, तर उर्वरित सात किमी अंतर ठाणे खाडीखाली असणार आहे.
“प्रस्तावित हायस्पीड बुलेट रेल्वे कॉरिडॉर ठाणे खाडीतून जाणार आहे. हा भाग फ्लेमिंगो आणि जवळच्या खारफुटीसाठी संरक्षित अभयारण्य आहे. त्यामुळे एका बोगद्याद्वारे समुद्राखालून रेल्वे ट्रॅक तयार केले जातील. जेणेकरुन परिसंस्थेला कुठल्याही त्रास होणार नाही” असे बुलेट ट्रेन प्रोजेक्ट सांभाळणाऱ्या नॅशनल हाय स्पीड रेल कॉर्पोरेशन लिमिटेडने म्हटले आहे.
सर्वात लांब रेल्वे वाहतूक करणारा हा भारतातील पहिला अंडरसी (समुद्राखालील) बोगदा असेल. हा बोगदा १३.२ मीटर रुंदीची ट्विन ट्रॅक (अप-डाऊन दोन्ही मार्गांची) सिंगल ट्यूब असेल. हे बांधकाम आवश्यकतेनुसार न्यू ऑस्ट्रियन टनेलिंग मेथड (NATM) आणि टनेल बोरिंग मशीन (TBM) या दोन्ही पद्धतींनी केले जाईल. प्राधिकरणाने प्रकल्पासाठी पाण्याखालील सर्वेक्षण यापूर्वीच केलेले आहे.
