संभाजीनगर : संभाजीनगरमध्ये विवाहितेने सासरकडच्यांकडून होणाऱ्या शारीरिक मानसिक आणि आर्थिक छळामुळे गळफास घेऊन आत्महत्या केल्याची घटना घडली आहे. ही विवाहिता सात महिने गर्भवती देखील होती. त्यामुळे आईसह पोटातल्या निष्पाप बाळाला देखील हुंडाबळीचा शिकार व्हावे लागले आहे.
मिळालेल्या सविस्तर माहितीनुसार, सासरकडच्या मंडळींच्या छळाला कंटाळून सात महिन्यांची गर्भवती असलेल्या सहाय्यक प्राध्यापिकांनी राहत्या घरी गळफास घेऊन आत्महत्या केली आहे. गारखेडा परिसरातील गजानन कॉलनीमध्ये हा प्रकार घडला. या प्रकरणी वर्षा दीपक नागलोत हिच्या आत्महत्येस कारणीभूत ठरणाऱ्या तिच्या सासरकडच्या लोकांवर गुन्हा दाखल करण्यात आला असून यामध्ये पती दीपक नगलोत सासरा राजाराम नगलोत, सासू देविका नगलोत आणि नणंद वैशाली जरवाले यांच्या विरोधात गुन्हा दाखल करण्यात आला आहे.
माहेरच्या लोकांनी लग्नामध्ये बारा लाखाचा हुंडा दिला होता तर सासरकडच्यांनी 15 लाखाची मागणी केली होती. त्यामुळे या विवाहित गर्भवती महिलेची सासरकडच्यांकडून सातत्याने छळवणूक होत होती. त्यामुळेच या दुर्दैवी मातेने आत्महत्येसारखे टोकाचे पाऊल उचलले आहे.