मुंबई- मशिदीत अजानच्या वेळी लाऊडस्पीकर वाजवण्याच्या विरोधात भाजपने आता लाऊडस्पीकरवरून हनुमान चालिसाचे पठण करून लाऊडस्पीकरला उत्तर देण्याची तयारी केली आहे. यासाठी भाजप नेते मोहित कंबोज यांनी दिल्लीतील कारखान्यातून दहा हजार लाऊडस्पीकर मागवले आहेत. पहिली खेप म्हणून 500 लाऊडस्पीकर मुंबईत पोहोचले आहेत.
मोहित कंबोज यांच्या म्हणण्यानुसार, त्यांच्या कार्यालयात लाऊडस्पीकर्ससाठी आतापर्यंत देशभरातून सुमारे 10 हजार अर्ज आले आहेत आणि त्यांना लाऊडस्पीकर मोफत देण्यात येणार आहेत. कंबोज म्हणाले की, त्यांना लाऊडस्पीकर वाटण्यापासून कोणीही रोखू शकत नाही. या संदर्भात भाजप नेते मोहित कंबोज यांनी सर्व मंदिरांना पत्र जारी करून मंदिरांमध्ये भजन कीर्तन आणि हनुमान चालीसा घेण्यास सांगितले आहे. कायदा सुव्यवस्था सांभाळणे हे सरकारचे काम आहे, पण ठाकरे आणि पवारांचे हे सरकार हिंदुद्रोही असल्याचा आरोप मोहित कंबोज यांनी केला आहे.
राज ठाकरे यांचे निकटवर्तीय इरफान शेख यांचा राजीनामा
दुसरीकडे मनसे अध्यक्ष राज ठाकरे यांनी मशिदीबाहेर हनुमान चालिसा पठण करण्याची आणि लाऊडस्पीकर हटवण्याची मागणी केल्याने त्यांच्याच पक्षातून बंडखोरी सुरू झाली आहे. या निर्णयाच्या निषेधार्थ नेते व कार्यकर्ते सातत्याने पक्षाचे राजीनामे देत आहेत. मुंबई आणि मराठवाड्यातील 35 कार्यकर्ते आणि नेत्यांनी पक्षाच्या पदाचा राजीनामा दिल्याचे वृत्त आहे. काल म्हणजेच गुरुवारी राज ठाकरे यांच्या जवळचे पक्ष सचिव इरफान शेख यांनी राजीनामा दिला.
