मुंबई- मुंबई पोलिसांनी अॅड. गुणरत्न सदावर्तेंना पुन्हा एकदा नोटीस पाठवली आहे. त्यामुळे गावदेवी पोलिसांनी आज त्याची चौकशी केली. गावदेवी पोलिसांनी सदावर्ते यांना ११० अंतर्गत नोटीस देखील पाठवली आहे. ही नोटीस राजकीय हेतूने प्रेरित असल्याचा दावा सदावर्तेंच्या वकिलांनी केला आहे. याच नोटीसीनंतर सदावर्ते यांनी माध्यमांशी संवाद साधला.
“ही नोटीस म्हणजे, सत्ताधाऱ्यांच्या पायाखालची वाळू सरकल्याचं द्योतक आहे. आम्हाला घटनेने दिलेलं स्वातंत्र्य आणि संविधानिक हक्क सरकार अशा प्रकारे हिरावून घेऊ शकत नाही. आमच्या हक्काला तुम्ही पायदळी तुडवू शकत नाही. त्यामुळे कायदेशीर बाबींना आम्ही डंके की चोट पर उत्तर देऊ. पोलिसांच्या कारवाईला आम्ही कधीच घाबरलो नाही, इथून पुढेही घाबरणार नाही” अशी आक्रमक प्रतिक्रिया सदावर्ते यांनी दिली. ‘सत्तेचा कितीही दुरुपयोग करा, जय श्रीराम म्हणणारे आणि जय भीम म्हणणारे आम्ही तुम्हाला घाबरणार नाही. डंके की चोट पर उत्तर देऊ’, असा इशारा त्यांनी ठाकरे सरकारला दिला.
अॅड. गुणरत्न सदावर्ते यांनी ‘एसटी कष्टकरी जनसंघ’ या संघटनेची स्थापना केली आहे. या माध्यमातून ते एसटी बँकेची निवडणूक लढवणार आहेत. तसेच यापुढे राज्यातील प्रत्येक निवडणूक आपण लढणार असल्याचं त्यांनी घोषित केलं आहे.
अॅड. गुणरत्न सदावर्ते अयोध्येला जाणार
अॅड. गुणरत्न सदावर्तेही अयोध्येचा दौरा करणार आहेत. आपण राम जन्मभूमीच्या केसमध्ये वकील होतो, त्यामुळे आपल्याला अयोध्येतून बोलावणं आलं आहे असं सांगत आपण लवकरच अयोध्येला जाणार आहे असं अॅड. गुणरत्न सदावर्तेंनी जाहीर केलं आहे. त्यांच्या पत्नी अॅड. जयश्री पाटील यांच्यासोबत या महिन्याच्या अखेरपर्यंत अयोध्येला जाणार असल्याचे त्यांनी सांगितले.
