पुणे : पनीर म्हंटले कि नक्कीच आपल्या तोंडाला चव आल्याशिवाय राहणार नाही. पनीर हा पदार्थ हमखास सगळ्यांना आवडतो. घरात जर काही सण किंवा काही कार्यक्रम असेल तर घरात बनवले जाते. मात्र आपण जे पनीर खातो ते भेसळयुक्त (Chemically mixed paneer) तर नाही ना? याची कधी खात्री केली आहे का? पुण्यातील पिंपरी चिंचवडमध्ये असाच एक धक्कादायक प्रकार उघडकीस आला आहे. यामध्ये अन्न व सुरक्षा विभागाच्या अधिकाऱ्यांनी (FDA) मोठी कारवाई करत 600 किलो केमिकल मिश्रित पनीर जप्त केले आहे.
काय आहे संपूर्ण प्रकरण?
पिंपरी चिंचवडमधील (Pimpari Chinchwad) मे. महाराष्ट्र मिल्क डेअरीवर खंडणी विरोधी पथक आणि अन्न व सुरक्षा विभागातील अधिकाऱ्यांनी छापे टाकले. यावेळी तब्बल 600 किलो केमिकल मिश्रित पनीर जप्त करण्यात आलं आहे. यामध्ये सर्वात धक्कादायक बाब म्हणजे, दुधाच्या पावडरमध्ये अॅसिटिक अॅसिड (Acetic acid) टाकून अतिशय गलिच्छ पद्धतीने हे पनीर (paneer) तयार केले जात होते. मागच्या अनेक वर्षांपासून हा धक्कादायक प्रकार सुरु होता.
या प्रकरणी डेअरीचा मालक साजिद मुस्तफा शेखसह अन्य सहा जणांच्या विरोधात गुन्हे दाखल करून त्यांना अटक करण्यात आली आहे. हा सगळा प्रकार उघडकीस आल्याने लोकांमध्ये मोठी खळबळ उडाली आहे.