पुणे : अफजल खान वधाच्या जिवंत देखाव्यावरून पुण्यामध्ये मोठा वाद निर्माण झाला होता . कायदा आणि सुव्यवस्थेचा प्रश्न निर्माण होऊ नये या दृष्टीने पोलीस प्रशासनाने अफजलखान वधाच्या जिवंत देखाव्यासाठी परवानगी नाकारली होती . दरम्यान संगम गणेश मंडळाच्या वतीने या जिवंत देखाव्याची परवानगी मिळावी यासाठी मोठ्या प्रमाणावर प्रयत्न करण्यात येत होते .
मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांना देखील ई-मेलच्या माध्यमातून या देखाव्याची परवानगी मिळण्याबाबत विनंती करण्यात आली होती . त्याचबरोबर २६ ऑगस्ट पासून संगम गणेश मंडळाचे कार्यकर्ते आणि पदाधिकारी उपोषणाला देखील बसणार होते.
दरम्यान या प्रकरणावर आता पूर्णविराम लागला आहे . पुणे पोलिसांनी परवानगी नाकारल्याचे पत्र मागे घेऊन संगम गणेश मंडळाला अफजल खान वधाचा जिवंत देखावा सादर करण्याची परवानगी दिली आहे.
