नवी दिल्ली- निवडणूक आयोगाने भारताच्या 15 व्या राष्ट्रपतींच्या निवडणुकीचे वेळापत्रक जाहीर केले आहे. त्यानुसार राष्ट्रपतीपदाची निवडणूक 18 जुलै रोजी होणार असून मतमोजणी 21 जुलै रोजी होणार आहे. मुख्य निवडणूक आयुक्त राजीव कुमार यांनी आज राष्ट्रपती निवडणुकीचे तपशीलवार वेळापत्रक जाहीर केले.
राष्ट्रपती रामनाथ कोविंद यांचा कार्यकाळ 24 जुलै 2022 रोजी संपत आहे. याआधी देशाच्या पुढील आणि 15व्या राष्ट्रपतींची निवड होणार आहे. गेल्या 45 वर्षांपासून याच निवडणुक पद्धतीने राष्ट्रपतींची देशाच्या सर्वोच्चपदी निवड होत आहे. 17 जुलै 2017 रोजी अखेरच्या राष्ट्रपतीपदाच्या निवडणुका झाल्या. राष्ट्रपती निवडण्यासाठी सामान्य लोक मतदान करत नाहीत. तर त्यासाठी जनतेने निवडून दिलेले प्रतिनिधी आणि वरच्या सभागृहातील लोकप्रतिनिधी मतदान करतात. राष्ट्रपतीपदाच्या निवडणुकीत दोन्ही सभागृहांचे सदस्य लोकसभा आणि राज्यसभेतील सदस्य मतदान करतील.
असा असेल निवडणूक कार्यक्रम
15 जून अधिसूचना जारी होणार
29 जून उमेदवारी अर्ज भरण्याची अखेरची तारीख
2 जुलैपर्यंत अर्ज मागे घेता येणार
18 जुलै, मतदान
21 जुलै मतमोजणी
दरम्यान या निवडणुकीसाठी राजकीय पक्षांना मतदारांना व्हीप लागू करता येणार नाही असे स्पष्ट निर्देश निवडणूक आयोगाकडून देण्यात आले आहेत
