12 पैकी 8 गेले; उरले किती ? 12 – 8 = 4 अहो, ही गळती शिवसेनेतील मंत्र्यांची आहे बरं का ! मविआ सरकारमधील मुख्य घटक पक्ष असलेल्या शिवसेनेत एकूण 12 मंत्री होते पण 20 जून रोजी शिवसेनेत बंड झालं आणि एकेक करत मंत्री, आमदार तसेच शिवसेना समर्थक अपक्ष आमदार शिंदे गटात सामील झाले. आता या शिंदे गटात एकूण 8 मंत्री दाखल झाल्यानं शिवसेनेत आजघडीला अवघे 4 मंत्री उरले आहेत.
……………………………..
शिवसेनेच्या 12 मंत्र्यांपैकी 8 जण बंडाच्या छावणीत
20 जून रोजी शिवसेना नेते, नगरविकास मंत्री एकनाथ शिंदे यांनी बंड पुकारलं आणि स्वपक्षाला म्हणजे शिवसेनेलाच खिंडार पाडलं. एकनाथ शिंदे सुरुवातीला काही आमदार सोबत घेऊन बाहेर पडले खरे पण त्यानंतर शिंदे गटाचा फुगवटा वाढतच गेला. आज या शिंदे गटात 8 मंत्र्यांसह 47 आमदार आहेत. या मंत्र्यांमध्ये शिवसेनेच्या तब्बल 6 मंत्र्यांचा समावेश असून उरलेले 2 मंत्री शिवसेना समर्थक अपक्ष आमदार आहेत.
शिंदे गटात सामील झालेले मंत्री (08) : एकनाथ शिंदे, शंभूराज देसाई, संदीपान भुमरे, गुलाबराव पाटील, दादा भुसे, उदय सामंत, बच्चू कडू, राजेंद्र पाटील यड्रावकर
शिवसेनेकडे उरलेले मंत्री (04) : आदित्य ठाकरे, शंकरराव गडाख, सुभाष देसाई, अनिल परब
………………………..
4 मंत्र्यांसह उरले 17 आमदार; शिवसेनेला पडलं खिंडार
सन 2019 च्या विधानसभा निवडणुकीत शिवसेनेचे 56 आमदार निवडून आले. त्यापैकी एका आमदाराचं निधन झाल्यानं शिवसेनेचं आताचं संख्याबळ 55 इतकं आहे. त्यापैकी तब्बल 38 आमदार आता शिंदे गटात सामील झाले आहेत. याचा अर्थ शिवसेनेकडे आता अवघे 17 आमदार उरले आहेत शिवाय 9 अपक्ष आमदार देखील या गटात डेरेदाखल झाल्यानं शिंदे गटाचा आकडा सध्या 47 वर जाऊन पोचलाय.
…………………………
बंडाची छावणी आणि शिवसेनेची फाळणी
एकेक आमदार आणि मंत्री शिंदेंनी केलेल्या बंडाच्या छावणीत डेरेदाखल झाल्यानं शिवसेनेला फाळणीला सामोरं जावं लागलंय. तिकडं बंडखोर आमदारांना निलंबनाच्या नोटिसा मिळाल्या असल्या तरी शिंदे गटात शिवसेनेचे दोन तृतीयांश आमदार दाखल झाल्यानं शिंदे गटाचं पारडं जड असल्याचं दिसून येतंय. बंडखोर आमदारांवरील निलंबनाच्या करवाईविरोधात शिंदे गटानं सर्वोच्च न्यायालयात धाव घेतलीये. शिवसेनेत माजलेली ही दुफळी आता काय इतिहास घडवणार हे येणारा काळच ठरवेल.
– संदीप चव्हाण
वृत्तसंपादक
TOP NEWS मराठी