एका बाजूला आपल्या पुत्र-प्रवक्त्यानं वंदनीय बाळासाहेबांच्या शिवसैनिकांना डुकरं, नाल्याची घाण, रेडा, कुत्रे, जाहील व मृतदेह म्हणायचं, त्यांचा बाप काढायचा तर दुसऱ्या बाजूला मात्र हिंदूविरोधी मविआ सरकार वाचवण्यासाठी याच आमदारांना समेटाची हाक द्यायची; याचा अर्थ काय ?
……………………………
काय शब्द ? काय भाषा ? काय बोलणं ?
एकीकडं आमचे पक्षप्रमुख आम्हाला परत या, समोर येऊन बसा, बोलून मार्ग काढू, अशी साद घालतात तर दुसरीकडं त्यांचे पुत्र-प्रवक्ते आमच्याविषयी वाट्टेल ते अपशब्द वापरून आमचा पाणउतारा करतात, हे कितपत योग्य आहे ? आम्ही कालही शिवसैनिक होतो, आजही शिवसैनिक आहोत आणि उद्याही शिवसैनिकच राहू, असं घसा फोडून फोडून सांगतोय पण काल-परवा काय आम्ही राज्याबाहेर गेलो तर यांच्यासाठी इतके वाईट ठरलो ? आम्ही लगेच गद्दार झालो ? आता आमचे मृतदेहच परत येतील, बरं झालं शिवसेनेतली घाण गेली… ही काय भाषा आहे ? शिंदे गटाचे प्रवक्ते दीपक केसरकर यांनी पत्रातून आणि एकनाथ शिंदेंनी ट्विट करून अखेर आपली खंत बोलून दाखवली.
……………………
हा असला कसला प्रवक्ता ? संजय राऊतांना आवरा..!
सुबह का भुला शाम को घर आया तो उसे भुला नहीं कहते, असं नुसतं म्हणायचंच असतं का ? आपल्या घरातली भांडणं अशी रस्त्यावर जाऊन सोडवायची नसतात तर ती घरात राहूनच सोडवायची असतात. राऊतांच्या तोंडून एकामागून एक निघणारी बेछूट विधानं शिंदे गटाच्या इतकी जिव्हारी लागलीत की, ‘आमच्या मतावर राज्यसभेवर निवडून गेला आहात; हिंमत असेल तर राजीनामा द्या,’ असं म्हणत संजय राऊतांवर हल्ला चढवलाय.
शरद पवारांच्या गळ्यातील ताईत बनलेल्या या संजय राऊतांनी शिवसेना संपवण्याचा विडाच उचललाय जणू ! आपले पुत्र देखील आता त्यांच्या नादी लागून त्यांच्याच तोंडची भाषा बोलत आहेत हे आपण कधी लक्षात घेणार ?
………………………
ऐकावे आमचे गाऱ्हाणे | एकनाथ म्हणे ||
राष्ट्रवादी-काँग्रेसशी नातं तोडा, मविआतून बाहेर पडा आणि शिवसेनेला भाजपशी जोडा तर आणि तरच हिंदुत्व टिकेल इतुकेच काय ते सांगणे… आपण म्हणता समेट करावी | पुत्र-प्रवक्ते बरळ ओकावी | कशी उरावी सहनशक्ती | एकनाथ म्हणे ||
आपला नम्र,
– एकनाथ म्हणे
– संदीप चव्हाण
वृत्तसंपादक
TOP NEWS मराठी
