कोल्हापूर : कोल्हापूर जिल्ह्याचे राष्ट्रवादी काँग्रेसचे ज्येष्ठ नेते आमदार हसन मुश्रीफ यांच्या घरावर गेल्या दोन महिन्यांमध्ये आज तिसऱ्यांदा ईडीने छापा मारला आहे. आज सकाळी कागल मधील त्यांच्या निवासस्थानी ईडीन छापेमारी सुरू केलीये.
दरम्यान तिसऱ्यांदा ही कारवाई केल्यामुळे हसन मुश्रीफ यांच्या पत्नी यांनी नैराश्यातून आपली भावना व्यक्त केली आहे. त्या म्हणाल्या की, “किती वेळा यायचं या ठिकाणी ? किती त्रास द्यायचा ? काही आहे की नाही… रोज उठून तेच सुरू आहे, एवढं काम करणारा माणूस आहे. रात्रंदिवस जनतेसाठी राबणारा माणूस आहे. आणि असं का करता ? आम्ही करायचं तरी काय यांना ? आम्हाला एकदाच गोळ्या घालून जायला सांगा…!” अशी भावनिक प्रतिक्रिया त्यांनी व्यक्त केली आहे.
दरम्यान 11 जानेवारी रोजी ईडीन पहिली छापेमारी केली होती. त्यानंतर हसन मुश्रीफ यांच्या विरोधात ईडी कडून 35 कोटींच्या मनी लॉन्ड्री प्रकरणात गुन्हा दाखल करण्यात आला आहे. तर मुरगूड पोलीस ठाण्यातही फसवणुकीचा गुन्हा दाखल करण्यात आला असून हा गुन्हा रद्द करण्यासाठी त्यांनी मुंबई उच्च न्यायालयात धाव घेऊन याचिका दाखल केली आहे. याचिकेवर त्यांना दिलासा मिळाला असला तरी आज पुन्हा एकदा त्यांच्यावर ही कारवाई केल्यामुळे मुश्रीफ यांच्या कुटुंबीयांमधून संताप व्यक्त केला जातो आहे.