पुणे- सिंहगड घाट रस्त्यावर पुन्हा एकदा इ बसचा अपघात झाला आहे. चालकाचे नियंत्रण सुटून बस कठड्याला धडकली. सुदैवाने कठडा मजबूत असल्यामुळे पुढील मोठी दुर्घटना टळली. अन्यथा बस आतकरवाडीच्या दरीत कोसळली असती. हा अपघात आज शुक्रवारी दुपारी साडेबाराच्या सुमारास सिंहगडावरून बस खाली येताना घडला. आठवडाभरात तिसरी घटना आहे.
वाहतूक कोंडीतून मुक्त करण्याच्या आणि हवा प्रदूषणही कमी करण्याच्या दृष्टीने मोठा गाजावाजा करून सिंहगडावर ई बसची सेवा सुरु करण्यात आली. सिंहगडावर सुट्ट्यांच्या दिवशी घाटरस्त्यात लागणाऱ्या वाहनांच्या रांगा, तासन्तास रेंगाळणाऱ्या वाहतूक कोंडीवर मार्ग काढण्यासाठी सहा महिन्यांपूर्वी वन विभागाने गडावर जाणारी खासगी वाहने बंद करण्याचा निर्णय जाहीर केला होता. घाट रस्त्यावर ‘पीएमपी’ने केलेल्या ई-बसच्या चाचण्याही यशस्वी झाल्या होत्या.
परंतु या बस सेवेचा पुरता बोजवारा उडाल्याचे चित्र आहे. सिंहगडावर ज्या ठिकाणी अपघाताची शक्यता वर्तवण्यात येत होती तिथेच आज, शुक्रवारी दुपारी साडेबाराच्या सुमारास गडावरुन आलेली बस थेट कठडयाला धडकली. मात्र, सुदैवानं तो कठडा मजबूत होता म्हणून ही बस आतकरवाडीच्या दरीत कोसळली नाही. अन्यथा मोठी दुर्घटना घडली असती. दिनांक 8 मे रोजी बसला चार्जिंग नसल्याने घाटात बस बंद पडून पर्यटकांचे हाल झाले होते. ही घटना ताजी असतानाच आज पुन्हा अपघात झाल्याने या बससेवेच्या सुरक्षिततेवर प्रश्नचिन्ह निर्माण झाले आहे.