तेलंगणा : हैदराबाद मधील सिकंदराबाद येथे एका इलेक्ट्रिक बाइक शोरूम मध्ये मोठी आगीची घटना घडली आहे. फायर ब्रिगेडच्या दोन गाड्यांनी या आगीवर नियंत्रण मिळवले आहे. सोमवारी रात्री ही घटना घडल्याचे समजते. दरम्यान या घटनेमध्ये आठ जणांचा दुर्दैवी होरपळून मृत्यू झाला आहे.
शोरूम मधील इतर लोकांना वाचवण्यात फायर ब्रिगेडच्या जवानांना यश मिळाले आहे. स्थानिक पोलिसांनी दिलेल्या माहितीनुसार, या इलेक्ट्रिक बाइक शोरूम मध्ये एक बाईक चार्जिंगसाठी लावली होती. हे चार्जिंग सुरू असताना शॉर्टसर्किट झाले. त्यामुळे ही आग लागल्याचे त्यांनी सांगितले.
इलेक्ट्रिक वाहनाला आग लागण्याची ही पहिली घटना नाहीये. यापूर्वी एप्रिलमध्ये तमिळनाडू येथे अशीच एक घटना घडली होती. तामिळनाडूतील एका शोरूम मध्ये एका दुचाकी वाहन मालकाने आपली ई-बाईक बॅटरी चार्जिंगसाठी लावली होती. शॉर्टसर्किटमुळे आग लागल्याने हे शोरूम देखील आगीमुळे भस्मसात झाले होते. या घटनेमध्ये पाच नवीन ई-बाईक आणि सर्विसिंगसाठी आलेल्या बारा इ-बाईक जळून खाक झाल्या होत्या.
