हिंदू सणासुदीला सामान्यपणे काळ्या रंगाचे कपडे वापरले जात नाहीत. कारण काळा रंग अशुभं असल्याचं मानलं जातं. मात्र हाच काळा रंग संक्रांतीच्या दिवशी आवर्जून परिधान केला जातो. यामागे काय खास कारण आहे. मकर संक्रांतीच्या दिवशी सूर्य धनु राशीतून मकर राशीत प्रवेश करतो. त्यामुळेच या संक्रमणाला मकर संक्रांत असं म्हटलं जातं.
हा दिवस हिवाळ्यामधील सर्वात थंड दिवस असतो. तसेच या संक्रमण कालावधीतील २४ तासांमध्ये रात्रीची वेळ ही दिवसापेक्षा अधिक असल्यान रात्र मोठी असते. म्हणूनच यादिवशी काळे कपडे घालण्यामागे हे एक महत्त्वाचं कारण असल्याचं सांगितलं जातं.
हा हिवाळ्यातील सर्वात थंड दिवस असतो. त्यामुळेच अधिक उष्णता शोषून घेणारे काळे कपडे या दिवशी आवर्जून परिधान केले जातात. इतर कोणत्याही रंगाच्या कपड्यांच्या तुलनेत उष्णता शोषून घेण्याची काळ्या रंगाची क्षमता अधिक असते. त्यामुळे शरीराला ऊब मिळते. काळ्या रंगाच्या कपड्यांचा फायदा शरीर उबदार ठेवण्यासाठी होतो. म्हणून अगदी लहान मुलांपासून वयस्कर लोकांपर्यंत सारेच जण या दिवशी काळ्या कपड्यांना प्राधान्य देतात.
संक्रांतीच्या काही दिवस आधीपासूनच सगळीकडे काळ्या रंगाची पैठणी, विविध साड्या, कुर्ते, लहान मुलांचे कपडे लक्ष वेधून घेतात. हल्ली पुरुषही काळ्या रंगाचा ट्रेंड फॉलो करताना दिसतात. इतर सणांना वर्ज्य असलेल्या काळया रंगाची जादू संक्रांतीला मात्र उठून दिसते.