शिवसेना खासदार संजय राऊत यांना जीवे मारण्याची धमकी देणाऱ्या एका संशयित तरुणाला पुणे पोलिसांनी ताब्यात घेऊन मुंबई पोलिसांच्या ताब्यात दिले आहे. आता या प्रकरणाची महत्वाची अपडेट आली असून त्याची माहिती गृहमंत्री आणि उपमुख्यमंत्री देवेंद्र फडणवीस यांनी दिली आहे.
राहुल तळेकर (अंदाजे वय 23) असे या संशयित तरुणाचे नाव आहे. पुण्यातील गुन्हे शाखेने शुक्रवारी रात्री साडेदहा वाजण्याच्या सुमारास खराडी परिसरातील जयशंकर हॉटेलमधून ताब्यात घेतले. संजय राऊत यांना जीवे मारण्याच्या धमकीचे मेसेज आल्यानंतर या मागे नेमकं कोण आहे, हे शोधून काढण्यासाठी मुंबई पोलिसांनी वेगाने तपास सुरु केला. मुंबईतील गुन्हे शाखेच्या मदतीने पुणे पोलिसांनी सापळा रचून तळेकर याला ताब्यात घेतले. त्यानंतर त्याला मुंबई पोलिसांच्या स्वाधीन करण्यात आले आहे.
देवेंद्र फडणवीस यांनी सांगितले की संजय राऊत यांना धमकी देणाऱ्या व्यक्तीची ओळख पटली आहे. धमकी देणारी व्यक्ती दारूच्या नशेत होती, असा प्राथमिक रिपोर्ट आहे. या प्रकरणाचा संपूर्ण तपास केला जाईल. धमकी कोणीही दिली असली तरी कारवाई होईल. राज्यात कोणी कुणाला धमकी दिली तरी पोलीस आणि सरकार शांत बसणार नाही. कोणत्याही व्यक्तीवर कारवाई होईल, असं देवेंद्र फडणवीस म्हणाले.
जे जे लोक चुकीचं काम करतील, बेकायदेशीर काम करतील त्यांच्यावर कारवाई होईल. मी आधीही सांगितलं आहे. आताही सांगतो. मी कुणाला घाबरत नाही. कुणालाही दबत नाही. मी कायद्यानेच वागतो. कायद्यानेच या ठिकाणी राज्य चालेल, धमकीवरून चेष्टा करण्याचं काय कारण आहे? असा सवालही त्यांनी केला.
ठाकरे गटाचे नेते संजय राऊत यांना जीवे मारण्याची धमकी आली आहे. लॉरेन्स बिश्नोई या गँगस्टरच्या नावाने ही धमकी देण्यात आली आहे. दिल्लीत आल्यावर एके 47 ने उडवून देणार असल्याचं धमकी देणाऱ्याने म्हटलं आहे. त्यामुळे एकच खळबळ उडाली आहे.
झेपत नसेल तर गृहमंत्रीपदाचा राजीनामा द्या
संभाजीनगर आणि मुंबईतील मालवणीतही दोन गटात राडा झाला. या सर्व राड्यावरून राष्ट्रवादीच्या खासदार सुप्रिया सुळे यांनी राज्याचे गृहमंत्री देवेंद्र फडणवीस यांना सुनावले आहे. ज्या पद्धतीने महाराष्ट्रात दंगल झाली आहे. या गोष्टी गंभीर आहेत. त्यामुळे झेपत नसेल तर गृहमंत्र्यांनी राजीनामा द्यावा, अशी मागणीच सुप्रिया सुळे यांनी केली आहे.