मुंबई – आम्ही शिवसेना सोडलेली नाही. आम्ही आजही शिवसेनेत आहोत. आम्ही बाळासाहेबांचे शिवसैनिकच आहोत. आम्ही शिवसेनेतून बाहेर पडलो असे म्हणणे चुकीचे आहे. मात्र आम्ही शिवसेना सोडल्याच भासवलं जात आहे. फक्त विधानसभेमध्ये आमच्या गटाला काय नाव असावे याची चर्चा सुरु आहे. अशी माहिती शिवसेनेचे बंडखोर आमदार आणि एकनाथ शिंदे यांच्या गटाचे प्रवक्ते दीपक केसरकर यांनी दिली आहे. शिवसेनेच्या बंडखोर नेत्यांची आज गुवाहाटीमधील हॉटेलात बैठक झाली. या बैठकीनंतर दीपक केसरकर यांनी माध्यमांशी ऑनलाईन संवाद साधला त्यावेळी ते बोलत होते.
दीपक केसरकर म्हणाले, ” उद्धव ठाकरे यांनी आम्ही या अगोदरही सांगितले होते. आम्हाला महाविकास आघाडीबरोबर जायचं नाही. आम्ही कोणाच्याही दबावाखाली निर्णय घेतला नाही. आम्हाला घाबरवण्याचा प्रयत्न केला जातोय. आम्ही शिवसेनाप्रमुख बाळासाहेब ठाकरेंचा विचार पुढे घेऊन जात आहोत. आम्ही शिवसेनेचेच सदस्य आहोत. एकनाथ शिंदे हे आमच्या गटाचे नेते आहेत. आम्ही शिवसेनेच्या चिन्हावर निवडून आलेलो आहोत. आमच्याकडे दोन तृतीयांश सदस्य आहेत”
शिवसेनेकडे ५५ आमदार होते. आता आमची संख्या ५० च्या वर झाली आहे. त्यामुळे १६ आमदार ज्यांच्याकडे आहे त्यांनी एवढी मोठी संख्या असलेल्या नेत्याला गटनेतेपदावरून हटवू शकत नाही. शिंदे यांना गटनेतेपदावरून हटवण्याचा निर्णय चुकीचा असून त्या विरोधात आम्ही न्यायालयात दाद मागणार आहोत असे केसरकर म्हणाले.
महाराष्ट्रात सध्या जे दाखवले जाते त्यापेक्षा परिस्थिती वेगळी आहे. त्यामुळे शिवसैनिकांनी रस्त्यावर येण्याची गरज नाही. कायदा हातात घेऊ नये, असे आवाहन दीपक केसरकर यांनी केले आहे. तसेच परिस्थिती नीट झाल्यावर आम्ही मुंबईत येऊ असे देखील ते या वेळी म्हणाले.
आमच्या पक्षाचे नाव शिवसेनाच
एकनाथ शिंदे यांनी सत्तासंघर्षात एक पाऊल पुढं टाकलं आहे. आपल्या गटाचं नाव आता त्यांनी ठेवलं असून ‘शिवसेना-बाळासाहेब ठाकरे’ असं शिंदे गटाचं नाव ठरल्याच्या चर्चा राजकीय वर्तुळात रंगल्या होत्या. मात्र आमच्या पक्षाचे नाव शिवसेनाच आहे. आम्ही शिवसैनिक म्हणून काम करणार आहे, असे म्हणत गटाचं नाव ठरल्याच्या चर्चांवर पडदा टाकला आहे.