पुणे- दैनिक प्रभातच्या धायरी येथील मुद्रणालयावर सहा ते सात अज्ञात इसमांनी मंगळवारी दुपारच्या सुमारास हल्ला केला. या हल्लेखोरांनी अनधिकृतपणे कार्यालयाच्या आवारात प्रवेश करून मुद्रणालयाच्या खिडकीच्या काचा आणि सीसीटीव्ही फोडून हल्लेखोर पसार झाले. या प्रकरणी अभिरुची पोलीस चौकीमध्ये गुन्हा दाखल करण्यात आला आहे.
याबाबतची माहिती अशी की, मंगळवारी (दि. 24) दुपारी कार्यालयाच्या मागील बाजूस पडलेल्या भिंतीकडून काही अज्ञात व्यक्तींनी प्रवेश केला. दैनिक प्रभातचे नुकसान करण्याच्या हेतूने तोडफोड करण्यास सुरूवात केली. त्यानंतर कार्यालयाच्या पाठीमागील बाजूने हे हल्लेखोर पसार झाले. मुद्रणालय कार्यालयाला 19 ते 20 खिडक्या आहेत. त्यापैकी निम्म्याहून अधिक खिडक्यांच्या काचा फोडण्यात आल्या आहेत.
दैनिक प्रभातच्या मुद्रणालयाशेजारील एका जागेत शहरातून गोळा केलेला शेकडो ट्रक राडारोडा स्वत:च्या भूखंडावर खाली करून घेणाऱ्या व्यावसायिकांनी बेदरकारपणे सर्व नियम धाब्यावर बसवून केलेल्या कृत्यामुळे दैनिक प्रभातच्या मुद्रणालयाची सीमाभिंत पाडली होती. याबाबत सिंहगडरोड पोलीस ठाण्यात तक्रार नोंदविण्यात आली होती. त्याचाच राग मनात धरून हा हल्ला झाल्याचा संशय व्यक्त केला जात आहे.