सांगलीच्या तासगावमध्ये द्राक्ष व्यापाऱ्याला मारहाण करत एक कोटी दहा लाखांचा रोकड लुटल्याचा प्रकार मंगळवारी घडला होता. सांगली पोलिसांनी तपासाची चक्रे वेगाने फिरवत आरोपींच्या अवघ्या आठ तासात मुसक्या आवळल्या. या प्रकरणी तीन जणांना अटक करण्यात आली आहे.
नितीन यलमार (वय 22),विकास पाटील (वय 32) आणि अजित पाटील (वय 22) असे तिघा आरोपींची नावे आहेत. या प्रकरणी महेश केवलानी यांनी फिर्याद दिली आहे.
महेश केवलानी द्राक्ष व्यापारी आहेत. द्राक्ष खरेदी केल्यानंतर तासगाव तालुक्यातील शेतकऱ्यांना पैसे देण्यासाठी 1 कोटी 10 लाखांचा रक्कम घेऊन केवलानी आपल्या स्कॉर्पिओ गाडीतून आले होते. तासगावच्या दत्तमाळ येथील वसंतदादा महाविद्यालयात शेजारी असणाऱ्या गणेश कॉलनी येथे केवलानी यांच्या गाडीचा पाठलाग केला. केवलानी आणि त्यांच्या चालकाला मारहाण करून आरोपींनी त्यांच्याकडील 1 कोटी 10 लाखांची रक्कम लुबाडून पोबारा केला होता. मंगळवारी सायंकाळी 7 वाजण्याच्या सुमारास हा प्रकार घडला.
पोलिसांनी सांगली जिल्ह्यामध्ये नाकाबंदी करून आरोपींच्या तपासासाठी सांगलीच्या स्थानिक गुन्हे अन्वेषण शाखेने तीन पथके नेमली होती. दरम्यान तासगाव तालुक्यातील मनेराजुरी येथील शिकोबा डोंगराच्या पायथ्याला काही संशयित व्यक्ती थांबल्याची माहिती खबऱ्याकडून मिळाली. स्थानिक गुन्हे अन्वेषण शाखेच्या पथकाने छापा मारून तिघांना ताब्यात घेतले. त्यांच्याकडे काही शस्त्र आणि रोकडे आढळून आली. तिघांच्याकडे अधिक चौकशी केली असता त्यांनी सदरची रक्कम ही तासगाव शहरातल्या द्राक्ष व्यापाऱ्यांकडून लुटल्याचा सांगितले. यावेळी त्यांच्याकडून एक कोटी नऊ लाख रुपये आणि गुन्ह्यात वापरलेली दुचाकी असा मुद्देमाल हस्तगत केला आहे, अशी माहिती सांगलीचे पोलीस अधीक्षक बसवराज तेली यांनी दिली.