पुणे – सोनाराच्या घरातून 85 लाखांच्या दोन किलो सोन्याच्या दागिन्यांची चोरी करणाऱ्या कामगाराला त्याच्या तीन साथीदारांसह विश्रांतवाडी पोलिसांनी बेड्या ठोकल्या. आरोपींमध्ये एका अल्पवयीन मुलाचा देखील समावेश आहे. आरोपींकडून 56 लाख 27 हजार रुपये किमतीचे सोन्याचे दागिने हस्तगत करण्यात आले आहेत.
याप्रकरणी मुकेश गोमाराम चौधरी (वय 22), रमेश रामलाल चौधरी (वय 27), भगाराम गोमाराम चौधरी (वय 38), जेठाराम कृष्णाजी चौधरी (वय 38, सर्वजण रा. खुडाला, बाली राजस्थान) सर्वांना अटक करण्यात आली आहे.
वरिष्ठ पोलीस निरीक्षक अजय चांदखेडे यांनी दिलेल्या माहितीनुसार, धानोरी भैरवनगर येथील सोनाराच्या घरातून 10 जानेवारी रोजी सुमारे 85 लाख रुपये किमतीचे दोन किलो 81 ग्रॅम सोन्याचे दागिने चोरी झाल्याची घटना घडली होती. या प्रकरणी विश्रांतवाडी पोलीस ठाण्यात गुन्हा दाखल करण्यात आला होता.
वरिष्ठ अधिकाऱ्यांनी दिलेल्या सूचनांनुसार गुन्ह्याच्या तपासासाठी एक विशेष पथक नेमण्यात आले होते. तपास पथकातील पोलीस अमलदार दीपक चव्हाण, प्रफुल मोरे, संदीप देवकाते, शेखर खराडे यांनी केलेल्या सीसीटीव्ही फुटेजच्या तांत्रिक तपासानुसार काही संशयित इसम मागील काही दिवसांपासून सोनाराच्या घराच्या परिसरात रेकी करत असताना आढळून आले. संबंधित सोनाराच्या दुकानात काम करणारा मुकेश चौधरी हा सुट्टीसाठी त्याच्या मूळ गावी राजस्थान येथे गेलेला असल्याची माहिती मिळाली होती.
गुन्ह्याचा तपास करताना या चोरीमध्ये मुकेश चौधरी याचाच हात असल्याचे निष्पन्न झाले. त्यानंतर पोलिसांनी खबऱ्याकडून मिळालेल्या माहितीच्या आधारे पोलिसांनी आरोपीना राजस्थान येथून ताब्यात घेऊन अटक केली.
सदरची कारवाई अप्पर पोलीस आयुक्त नामदेव चव्हाण, पोलीस उपायुक्त रोहिदास पवार, सहाय्यक पोलीस आयुक्त रमेश गलांडे, वरिष्ठ पोलीस निरीक्षक अजय चांदखेडे, गुन्हे निरीक्षक विजयकुमार शिंदे यांच्या मार्गदर्शनाखाली तपास पथकाचे प्रमुख उपनिरीक्षक लहू सातपुते, पोलीस हवालदार विजय सावंत, दीपक चव्हाण, यशवंत किरवे, पोलीस अंमलदार संदीप देवकाते, प्रफुल मोरे, शेखर खराडे, योगेश चांगण, शिवाजी गोपनर, तांत्रिक विश्लेषण विभाग परिमंडळ चारचे पोलीस अंमलदार श्याम शिंदे, विशेष पोलीस अधिकारी राज राठोड यांच्या पथकाने ही कामगिरी केली.