पुणे- पंतप्रधान नरेंद्र मोदी यांनी लोकसभा आणि राज्यसभेत केलेल्या वक्तव्यावरून देशभरात राजकारण पेटले आहे. महाराष्ट्र काँग्रेसने कोरोना पसरविला असा आरोप पंतप्रधान नरेंद्र मोदी यांनी केला होता. पंतप्रधानांच्या या वक्तव्याचा निषेध करण्यासाठी कॉंग्रेसने पुण्याच्या भाजप कार्यालयासमोर जोरदार आंदोलन सुरु केले. त्याचवेळी भाजपच्या कार्यकर्त्यांनी घोषणाबाजी सुरु केल्यामुळे भाजपा कार्यालय समोर काही काळ तणावाचं वातावरण निर्माण झाले होते.
एकीकडे काँग्रेसचे नेते कोरोना आम्ही नाही तर मोदी सरकारने पसरवला असा आरोप करत होते. तर दुसरीकडे भाजपचे कार्यकर्ते याला विरोध करत होते. त्यामुळे या ठिकाणी काही काळ गोंधळाचे वातावरण निर्माण झाले होते.
काँग्रेसचे शहराध्यक्ष रमेश बागवे म्हणाले, ” केंद्र सरकारने गेल्या दोन-तीन वर्षात पेट्रोल डिझेलचे दर वाढवले त्याचा फटका सामान्य जनतेला बसत आहे. कोरोना काँग्रेसने पसरवला असा खोटा आरोप केला आहे. मोदी सरकार कोरोना हाताळण्यात अपयशी ठरले आहे याचा त्यांना फटका महानगरपालिका निवडणुकीत नक्कीच बसेल”
भाजपचे कार्यकर्ते प्रतीक देसरडा म्हणले, “पंतप्रधान नरेंद्र मोदी यांनी कोणतेही चुकीचे वक्तव्य केले नाही. पंतप्रधान नरेंद्र मोदी यांनी कोरोना काळात किती चांगले काम केले हे सामान्य जनतेला चांगलेच माहीत आहे”