पुणे : भाजप नेते आणि उच्च व तंत्रशिक्षण मंत्री चंद्रकांत पाटील यांच्यावर शाईफेक करण्यात आली होती मात्र याप्रकरणी अटक करण्यात आलेल्या आरोपींवर लावण्यात आलेल्या कलमांवर ॲड. असीम सरोदे यांनी आक्षेप घेतलाय. यंत्रणांच्या मदतीनं कायद्याच्या गैरवापराचं हे उदाहरण असल्याचं त्यांनी आपल्या ट्विटमध्ये म्हटलंय.
चंद्रकांत पाटील यांच्यावर शाईफेक प्रकरणी मनोज घरबडे, धनंजय इजगज आणि विजय ओवाळ यांना अटक झाली होती. त्यांना 14 डिसेंबर पर्यंत पोलीस कोठडी सुनावण्यात आलीये मात्र या गुन्ह्यात लावण्यात आलेल्या कलमांवरुन आता वाद सुरू झालाय. या वादात प्रसिद्ध कायदेतज्ज्ञ असीम सरोदे यांनी उडी घेतलीये. त्यांनी ट्वीट करत पोलिसांनी लावलेल्या कलमांवर आक्षेप घेतलाय.
शाइफेक प्रकरण-कलम 307 म्हणजे जीवे मारण्याचा प्रयत्न करणे व 120 ब,आर्म्स ऍक्ट चा वापर अतिरेकीपणा आहे,यंत्रणांच्या मदतीने कायद्याच्या गैरवापराचे हे उदाहरण आहे त्यामुळे आमची लीगल टीम आरोपींची केस मोफत चालवेल.परंतु शाईफेकीचा व बेताल वक्तव्य करणाऱ्यांचा निषेध.#शाईफेक #बेतालनेते pic.twitter.com/fQ7rwzVBVa
— Asim Sarode (@AsimSarode) December 11, 2022
‘शाइफेक प्रकरण-कलम 307 म्हणजे जीवे मारण्याचा प्रयत्न करणे व 120 ब, आर्म्स ऍक्टचा वापर अतिरेकीपणा आहे. यंत्रणांच्या मदतीनं कायद्याच्या गैरवापराचं हे उदाहरण आहे. त्यामुळे आमची लीगल टीम आरोपींची केस मोफत चालवेल. परंतु शाईफेकीचा व बेताल वक्तव्य करणाऱ्यांचा निषेध”, असं ट्विट सरोदे यांनी केलंय. तर दुसऱ्या ट्वीटमध्ये ‘मी अनावश्यक कलमांचा वापर करण्याचा विरोधात आहे. कलम 326 शस्त्राचा वापर करून गंभीर दुखापत करणे या गुन्ह्यासाठी सुद्धा 10 वर्षे किंवा जन्मठेप अशी शिक्षा होऊ शकते मग शाईफेकीसाठी कलम 307 जीवे मारण्याचा प्रयत्न हे कलम का लावायला सांगण्यात आले ? इतकाच प्रश्न आहे,’ असंही त्यांनी म्हटलंय.
चंद्रकांत पाटील शाईफेक प्रकरणात आरोपींवर लावण्यात आलेली अनावश्यक कलमं आणि 11 पोलिसांचं निलंबन या गोष्टी पाहाता यावरुन आता राजकीय वातावरण तापण्याची शक्याता वर्तवली जातेय.