मुंबई- भाजप खासदार ब्रजभूषण सिंह यांनी मनसे अध्यक्ष राज ठाकरे यांच्या विरोधात शड्डू ठोकले आहेत. राज ठाकरे यांच्या अयोध्या दौऱ्याला त्यांनी कडाडून विरोध केला आहे. आता ब्रजभूषण यांचे एक विधान मनसेच्या जिव्हारी लागले आहे. या प्रकरणी मनसेने दादर पोलीस ठाण्यात तक्रार दाखल केली आहे.
मनसेचे पदाधिकारी आणि मनसे जनहित कक्षाचे वकील ऍडव्होकेट गजणे, ऍडव्होकेट रवी पाष्टे, उपविभाग अध्यक्ष शशांक नागवेकर यांनी दादर पोलीस ठाण्यात तक्रार दिली आहे. एका वृत्तवाहिनीशी बोलताना ब्रजभूषण सिंह म्हणाले होते की, राज ठाकरेंचा बाप देखील अयोध्येत येऊ शकणार नाही.
‘बिहारचा बक्सर हा असा भाग आहे, जिथे भगवान राम यांनी शिक्षण ग्रहण केले. विश्वामित्रांनी लंका अभियानाची योजना इथूनच तयार केली. त्याच धरतीवरून आम्ही अयोध्या आंदोलनासाठी समर्थन मागायला आलेलो आहे’ असेही ब्रजभूषण म्हणाले होते.
माफी मागा मग अयोध्येत या !
राज ठाकरे यांनी अनेकदा आपल्या भाषणांमधून परप्रांतीयांचा मुद्दा लावून धरला. या मुद्द्यावरून त्यांनी उत्तर भारतीयांना सुनावले. त्यालाच उत्तर म्हणून ब्रजभूषण सिंह यांनी राज ठाकरे यांना अयोध्येत येण्यास मनाई केली. राज ठाकरे यांनी माफी मागावी अन्यथा त्यांना अयोध्येत पाय ठेऊ देणार नाही अशी भूमिका ब्रजभूषण सिंह यांनी घेतली. या विधानाचे पडसाद उमटताच राज ठाकरे यांनी आपला अयोध्या दौरा रद्द केला.
आज ब्रजभूषण यांनी राज ठाकरे यांना पुन्हा आव्हान दिल्यामुळे मनसे कार्यकर्त्यांनी तक्रार दाखल केली आहे.